داخرانی نیمچەیی دامەزراوە حکومییەکانی ئەمریکا دەستیپێکرد

ئاڤا نیوز

بەهۆی ڕێکنەکەوتنی کۆنگرێس لەسەر بودجەی ساڵی 2026، حکومەتی ئەمریکا لە بەرەبەیانی ئەمڕۆ شەممەوە چووە ناو پەککەوتنی نیمچەیی دامەزراوە فیدراڵییەکان (Shutdown).

چیرۆکی سەرەکی:  حکومەتی ئەمریکا لە بەرەبەیانی ڕۆژی شەممەوە، 31-1-2026، چووە ناو پەککەوتنی نیمچەیی دامەزراوەکان (Partial Shutdown). ئەمەش دوای ئەوەی کۆنگرێس نەگەیشتە ڕێککەوتن لەسەر بودجەی ساڵی 2026 پێش وادەی دیاریکراو. 

زانیاریی زیاتر: قەیرانی بودجەکە کاتێک سەرهەڵدا کە دانوستانەکانی نێوان کۆماریی و دیموکراتەکان بەهۆی تووڕەیی دیموکراتەکان لە کوژرانی دوو خۆپیشاندەر لە "مینیاپۆلیس" لەلایەن پۆلیسی فیدراڵیی کۆچبەرانەوە (ICE) شکستیان هێنا، ئەم ڕووداوە وایکرد دیموکراتەکان ڕێگریی لە تەرخانکردنی پارەی نوێ بۆ وەزارەتی ئاسایشی نیشتمانیی بکەن.

ئەوەی پێویستە بیزانیت: لە ئێستادا نزیکەی سێ چارەگی کارە فیدراڵییەکان لە کەرتە هەستیارەکانی وەک پەروەردە، تەندروستیی، نیشتەجێبوون و بەرگریی کەوتوونەتە ژێر کاریگەریی ئەم بڕیارە و دەیان هەزار فەرمانبەری فیدراڵیی ناچار دەکرێن بڕۆنە مۆڵەتی بێمووچە، یان تا کاتی پەسەندکردنی بودجە بەبێ وەرگرتنی مووچە بەردەوام بن لە کارەکانیان.