ئەندامێکی سەرکردایەتیی یەکێتی: کۆبوونەوەی ئەمڕۆی پارتی و یەکێتی تەواوکەری کۆبوونەوەی هەفتەی ڕابردووە

ئاڤا نیوز

ئەندامێکی سەرکردایەتیی یەکێتی دەڵێت، کۆبوونەوەی ئەمڕۆی پارتی و یەکێتی درێژەپێدەر و تەواوکەری کۆبوونەوەی هەفتەی ڕابردووە، ئەگەر لەسەر کاندیدی هاوبەش نەگەیشتن بە ڕێککەوتن، بابەتەکە لە هۆڵی پەرلەمان یەکلایی دەکرێتەوە.

وێنە گەورەکە: بەپێی زانیارییەکانی ئاڤا میدیا، وابڕیارە ئەمڕۆ چوارشەممە 11-2-2026، پارتی و یەکێتی لەسەر ئاستی باڵا کۆببنەوە و گفتوگۆی پۆستی سەرۆککۆمار بکەن، بەو ئامانجەی لەسەر ئەم بابەتە بگەنە ڕێککەوتن.

- لەتیف نێروەیی، ئەندامی سەرکردایەتیی یەکێتی بە میدیای حیزبەکەی ڕاگەیاند: کۆبوونەوەی ئەمڕۆی یەکێتی و پارتی لە ئاستی باڵا، درێژکراوە و تەواوکەری کۆبوونەوەی هەفتەی ڕابردووە، وەک ئەوەی بافڵ تاڵەبانی لە کۆبوونەوەی ئەنجوومەنی دەوڵەت، بە ئەرێنی باسی کۆبوونەوەکەی کرد.

- یەکێتی جدیە لە دانووستان و هیوادارین پارتیش بێتە پێشەوە و کۆبوونەوەی ئەمڕۆ ڕێگە خۆشکەر بێت بۆ پێکهێنانی کابینەی نوێی حکومەتی هەرێمی کوردستان و پێکهێنانی کابینەی حکومەتی عێراقیش، چونکە بارودۆخی ناوچەکە و عێراق ناسەقامگیرە، پێویستە بۆ هەموو ئەگەرێک ئامادەبین، ئەگەر ئێمە وەک کورد پلانی هاوبەشمان هەبێت بێگومان دەستکەوتی باشترمان دەبیت.

ئەوەی پێویستە بیزانیت: ئەو ئەندامەی سەرکردایەتیی یەکێتی، ئەوەشی گوت: ئەگەر یەکێتی و پارتی لەسەر کاندیدی هاوبەش نەگەیشتن بە ڕێککەوتن شتێکی ئاساییە و چەند جارێک پێشتر ئەوە ڕوویداوە، ئەمە پرۆسەیەکی دیموکراسیە، لەو بارەدا ئەم بابەتە لە هۆڵی پەرلەمانی عێراق یەکلایی دەبێتەوە.

- پۆستی سەرۆککۆمار بە مافی خۆمان دەزانین، وەک چۆن پۆستی جێگری سەرۆکی پەرلەمان پشکی پارتیە و ئێمە بەبێ مەرج دەنگمان بە د. فەرهاد ئەترووشی بە کاندیدی پارتی دا.