پەرلەمانتارێکی عێراق بۆ ئاڤا: بۆ پرسی سەرۆککۆمار چاوەڕێی کۆبوونەوەکەی هەولێرین

ئاڤا نیوز

 

ئەندامێکی پەرلەمانی عێراق ڕایگەیاند، دیاریکردنی وادەی هەڵبژاردنی سەرۆککۆماری عێراق پێویستی بە ڕێککەوتن و لێکتێگەیشتنی پێشوەخت لەنێوان لایەنەکان هەیە، بۆ ئەو مەبەستەش چاوەڕێی دەرئەنجامی کۆبوونەوەی ئەمڕۆی پارتی و یەکێتی لە هەولێر دەکەن.

 

چیرۆکی سەرەکی: ئەمڕۆ، چوارشەممە شاندی یەکێتی نیشتمانیی کوردستان گەیشتنە پیرمام و لەگەڵ شاندی پارتی کۆبوونەوە دەکەن؛ چەند پرسێکی وەک کاندیدی سەرۆککۆمار و پێکهێنانی کابینەی 10ی حکومەتی هەرێمی کوردستان تاوتوێ دەکەن.

 

لێدوانی فەرمی: شێروان دووبەردانی، ئەندامی پەرلەمانی عێراق، ئەمڕۆ چوارشەممە، بە ئاڤای میدیای ڕاگەیاند، تائێستا لە پەرلەمان پێشهاتی تازە لەبارەی کۆبوونەوەی هەڵبژاردنی سەرۆککۆمار نییە، هەموو چاوەکانیش لەسەر دەرئەنجامی کۆبوونەوەی ئەمڕۆی پارتی و یەکێتین، ئاخۆ دەگەنە ئەنجام یاخود نا.

 

زانیاری زیاتر: وتیشی، زەحمەتە سبەی کۆبوونەوەی هەڵبژاردنی سەرۆککۆمار بکرێت، چونکە ئەم بابەتە پێشوەخت پێویستی بە ڕێککەوتن هەیە، هەر کاتێکیش ڕێککەوتن کرا، سەرۆکایەتی پەرلەمان وادەکەی دیاری دەکات.

 

باکگراوند: بەپێی عورفی سیاسی لە عێراق پۆستی سەرۆککۆمار پشکی کوردە، بەڵام چەندین کاندید لە پێکهاتە جۆراوجۆرەکان بۆ وەرگرتنی پۆستەکە هەن، کێبڕکێی بەهێز لەنێوان د، فوئاد حوسێن، کاندیدی پارتی و نزار ئامێدی، کاندیدی یەکێتییە.

 

- بەپێی ماددەی 70ـی دەستووری عێراق، سەرۆککۆمار بە دەنگی دوو لەسەر سێی پەرلەمانتاران دەبێت، کە دەکاتە 222 پەرلەمانتار، بەڵام ئەگەر لە خوولی یەکەمی هەڵبژاردنەکەدا هیچ کاندیدێک دەنگی پێویستی نەهێنا، لە خوولی دووەمدا کێبڕکێکە لەنێوان دوو کاندیدا ئەنجامدەدرێت، کە زۆرترین دەنگیان هێناوە، هەرکامیان زۆرترین دەنگیان هێنا دەبێتە سەرۆککۆمار.