دەزگای خێرخوازی بارزانی 401 بارهەڵگری هاوکاریی مرۆیی دەگەیێنێتە ڕۆژئاوای کوردستان

ئاڤا نیوز

دەزگای خێرخوازی بارزانی 401 بارهەڵگری هاوکاریی مرۆیی دەگەیێنێتە ڕۆژئاوای کوردستان و هاوکات سێ ملیۆن 360 هەزار نان بەسەر خەڵکی قامیشلۆ دابەش دەکات.

لێدوانی فەرمی: کارزان نووری، ئەندامی دەستەی کارگێڕیی دەزگای خێرخوازیی بارزانی ڕایگەیاند: لە ڕۆژانی داهاتوو پڕۆژەی دابەشکردنی نان لە قامشلۆ دەستپێدەکات، بۆ ئەو مەبەستە توانراوە 200 تۆن ئارد بۆ نانەواخانەکانی قامشلۆ دابین بکرێت."

کارزان نووری دەشڵێت: "لە ماوەی داهاتوو سێ ملیۆن و 360 هەزار نان بەسەر خەڵکی قامشلۆ دابەش دەکرێت، ئەگەر ڕۆژانە 70 هەزار نان دابەش بکرێت، ئەوا دەتوانرێت بۆ ماوەی 48 ڕۆژ، نان دابین بکەین."

٠ چەند ڕۆژێکە دەزگای خێرخوازیی بارزانی هەڵمەتێکی دەستپێکردووە بەمەبەستی گەیاندنی هاوکاری بۆ ئەو خێزانانەی لە دەرەوەی قوتابخانە و مزگەوتەکانن.

٠ تا ئیستا دوو هەزار و 71 خێزان هاوکاریکراون، دەزگای خێرخوازیی بارزانی بەردەوام هەموو هەوڵێک دەدات تا بتوانێت دەستی هاوکارییەکانی بگەیێنێتە ناو کۆبانێ، بەڵام تا ئێستا ڕەزامەندی نەدراوە.

 

زانیاریی زیاتر: لەماوەی 21 ڕۆژی کارکردنیدا، دەزگای خێرخوازیی بارزانی توانیویەتی بەمشێوەی خوارەوە هاوکارییەکانی ببەخشێت:

٠ 401 بارهەڵگر کۆمەک و هاوكاريی لە هەرێمی کوردستانەوە، لەڕێگەی دەزگای خێرخوازیی بارزانی گەیەنراوەتە ڕۆژئاوای کوردستان.

٠ 349  هەزار 841 لیتر سووتەمەنی دابەش كراون و 9 هەزار و 531 خێزان لێی سوودمەند بوون.

٠ 97 هەزار  و 559 کەس سوودمەندبوونە لە ژەمە خۆراكی گەرم.

٠ 18 هەزار و 932 خێزان لە خۆراک و کەلوپەلی جۆراوجۆر سوودمەندبوونە.

٠ هەشت هەزار و 77 كەس چارەسەری پزیشكییان بۆ كراوە، زیاتر لە 20 تۆن دەرمان پێشکەش بە نەخۆشخانەکانی ڕۆژئاوای کوردستان کراوە.

ئەمەش بزانە: لە ڕۆژانی داهاتوو بارهەڵگرەکانی دەزگای خێرخوازیی بارزانی دەچنە ناو  کۆڵانەکانی گەڕەکە هەژارنشینەکانی قامشلۆ و گوندەکان و کۆمەک و هاوکارییەکانیان دەبەخشن، هاوکات عارەبانە بۆ خاوەن پێداویستە تایبەتەکان دابین دەکەن.