دۆسیەی ئەمنی کەرکووک ڕادەستی پۆلیسی خۆجێیی دەکرێت

ئاڤا دیجیتاڵ

بەمەبەستی کۆتاییهێنان بە ئامادەکارییەکان بۆ کشانەوەی سوپا و ڕادەستکردنی دۆسیەی ئەمنی سەنتەری شار بە پۆلیسی فیدراڵی، وەزیری ناوخۆی عێراق سەردانی کەرکووکی کرد. لە کۆنگرەیەکی ڕۆژنامەوانیشدا ڕایگەیاند، ئامادەکاری تەواو دەکەین و پاڵپشتی زۆر باشی هێزەکانی پۆلیسی کەرکووک دەبین.

گرنگی هەواڵەکە: لە ساڵی 2003ـوە تاوەکو ساڵی 2017 دۆسیەی ئەمنیی کەرکووک بەدەستی پۆلیسەوە بوو، بەڵام دوای هێرشەکانی 16ـی ئۆکتۆبەری 2017 بۆ سەر شارەکە، دۆسیەکە رادەستی سوپا کرا و لەوکاتەوە دۆسیەی ئەمنییان لەدەستدایە، بەردەوامیش پێکهاتەکان و لایەنە کوردستانییەکان نیگەرانییان لەوبارەیەوە نیشانداوە، چەندجارێکیش گرژی لەنێوان سوپا و گەنجانی کورد ڕوویداوە و قوربانی لێکەوتووەتەوە.

چیرۆکە سەرەکی: عەبدولئەمیر شممەری، وەزیری ناوخۆی عێراق، درەنگانی شەوی ڕابردوو 24-1-2024 بەمەبەستی ئامادەکاریکردن بۆ ڕادەستکردنی دۆسیەی ئەمنی پارێزگای کەرکووک بە پۆلیسی فیدراڵی، لە بەغداوە گەیشتە شارەکە.

لێدوانی فەرمی: عەبدولئەمیر شممەری لە کۆنگرەیەکی ڕۆژنامەوانیدا رایگەیاند، بۆ چاودێریکردنی هێزەکانی پۆلیس سەردانی کەرکووکی کردووە. گوتیشی: "لە داهاتوودا پۆلیسی کەرکووک دۆسیەی ئەمنی سەنتەری شار و قەزا و ناحیەکانی پێدەسپێردرێت، ئامادەکاری تەواو دەکەین و پاڵپشتی زۆر باشی هێزەکانی پۆلیسی کەرکووک دەبین".


زانیاری زیاتر: عەبدولئەمیر شممەری، وەزیری ناوخۆی عێراق باسی بەشێک لە ئامادەکارییەکانی کرد و گوتی: لەلایەن ئیدارەی کەرکووک و لەنێو بازگە سەرەکییەکان کامێرای زیرەک دادەنرێت، هەروەها سۆناری ئۆتۆمبێلیش لە بازگەکان دادەنرێت، چونکە بازگەکانی کەرکووک گرنگییەکی زۆریان هەیە بۆ پاراستنی ئاسایشی کەرکووک و پارێزگاکانی دیکەی هاوسنووری کەرکووک".

ئەوەی پێویستە بیزانیت: بەپێی کارنامەی کابینەی محەممەد شیاع سوودانی، سەرۆکوەزیرانی عێراق، دەبوو لە ماوەیەکی دیاریکراودا، سوپا و هێزە سەربازییەکان لەنێو شارەکان بکشێنەوە و پۆلیسی خۆجێیی لەجێگەیان دابندرێت. بەپێی زانیارییەکانی ئاڤا میدیاش لە ماوەی دوو مانگی داهاتوودا لە کەرکووک دۆسیەکە ڕادەستی پۆلیس دەکرێت. ئەگەر دۆسیەکەش ڕادەستی پۆلیس بکرێت، سوپا دەچێتە دەرەوەی شار، واتە لە داقووق، دووبز و حەویجە جێگیر دەبێت.


باکگراوند: پێشتر سێ لیژنە بۆ ئەو مەبەستە پێکهێنرابوون، لیژنەی پڕچەککردن و پێداویستییەکانی چەک و تەقەمەنی بۆ لێکۆڵینەوە لەوەی پۆلیسی کەرکووک چەند چەکی هەیە و چەندیان پێویستە، لیژنەی فریاکەوتن بۆ تاوتوێکردنی پێویستییەکانی پۆلیسی فریاکەوتن، لیژنەی تایبەت بە پۆلیسی نەهێشتنی تاوان. ئەو لیژنانە ڕاپۆرتێک بۆ فەرماندەی گشتیی هێزە چەکدارەکان و سەرۆکوەزیران ئامادە دەکەن، دواتر رەزامەندی دەدرێت بۆ گواستنەوەی دۆسیەی ئەمنی بۆ پۆلیس.