لە پەرلەمانی عێراق واژۆ بۆ دامەزراندنی بژمێرەکانی کوردستان کۆدەکرێتەوە

ئاڤا نیوز

بەشێک لە پەرلەمانتارانی کورد لە پەرلەمانی عێراق واژۆ بۆ بەهەمیشەییکردنی گرێبەستی بژمێرەکانی کوردستان کۆدەکەنەوە، کە ژمارەیان 18 هەزار و 500 کەسە.

چیرۆکی سەرەکی: بژمێرەکانی هەرێمی کوردستان کە ژمارەیان 18 هەزار و 500 کەسە، داوا دەکەن لە گرێبەستی کاتییەوە بکرێن بە گرێبەستی هەمیشەیی، بۆیە داوا لە سەرۆکی پەرلەمان دەکەن ڕەزامەندی بدات، بەتایبەتیش بەهۆی ئەوەی ئەوان خاوەنی بڕوانامەی زانستین.

لێدوانی فەرمی: سروە محەممەد، ئەندامی پەرلەمانی عێراق بە ئاڤای ڕاگەیاند، بە واژۆی زیاتر لە 40 پەرلەمانتار، داوایان لە سەرۆکایەتی پەرلەمانی عێراق کردووە گرێبەستی بژمێرەکانی هەرێمی کوردستان بەهەمیشەیی بکرێت.

ئەوەی پێویستە بیزانیت: پێشتریش وەزارەتی پلاندانانی کوردستان ڕایگەیاندبوو، سەبارەت بە داواکاريی دامەزراندنی بژمێرەکان، ئەم بابەتە لە چوارچێوەی بەرپرسیاریەتيی وەزارەتیان نیە، بەڵام لە بوونی دەرفەت بۆ دامەزراندن لە یاسای بودجەی فیدراڵ و بەشی هەرێمی کوردستان تێیدا دەتوانن لە ناو کێبڕکێی دامەزراندن بن و بەشداریکردنیان لە سەرژمێری دەبێتە خاڵێکی بەهێز بۆیان.