خالید شوانی: ئەو زیندانییانەی لە سووریا گواستراونەتەوە بۆ عێراق هیچیان بۆ کوردستان نانێردرێن

ئاڤا نیوز

تا ئێستا زیاتر لە پێنج هەزار زیندانیی داعش لە سووریا بۆ عێراق گواستراونەتەوە، وەزیری دادی عێراق ئاشکرای دەکات، هیچ کام لەو زیندانییانە بۆ هەرێمی کوردستان نانێردرێن.

وێنە گەورەکە: لە چوارچێوەی ڕێککەوتنێکی سێقۆڵی نێوان هێزەکانی هاوپەیمانان، سوپای سووریا و هێزەکانی سووریای دیموکرات (هەسەدە)، هێزەکانی ئەمریکا دەستگیرکراوانی ڕێکخراوی تیرۆرستی داعش لە پارێزگای حەسەکە بۆ عێراق دەگوازێتەوە.

لێدوانی ڕۆژنامەوانی: خالید شوانی، وەزیری دادی عێراق بە میدیاکانی ڕاگەیاند، تا ئەم ساتە پێنج هەزار و 46 زیندانیی داعش کە لە سووریاوە گواستراونەتەوە وەرگیراون، لەوانەیە ڕێژەکە بەرزبێتەوە و بگاتە شەش هەزار زیندانیکراو.

ئاماژەی بەوەشکرد، ئەو زیندانییانەی بۆ عێراق گواستراونەتەوە، زیاتر بیانین و سەر بە زیاتر لە 60 وڵاتن، بەڵام زۆرترینیان هاووڵاتی سووریان، دوای سووریا وڵاتانی دەوروبەر دێن.

٠ هیچ زیندانییەک لەو زیندانییانەی کە هێنراون بۆ عێراق، نانێردرێن بۆ هەرێمی کوردستان یاخود بۆ بەندیخانەکانی سووسێ و چەمچەماڵ، لەبەرئەوەی ئەو بەندیخانانە، بەندیخانەی تاوانی مەدەنین، بەڵام ئەوانەی لە سووریاوە گواستراونەتەوە تیرۆرستن، بۆیە لە زیندانێکی دیاریکراو لە بەغدا دەمێنن و لە ژێر چاودێرییرکی توونددا دەبن.

٠ ئەم زیندانییانە هەموویان لە عێراق دادگایی دەکرێن، بۆ ئەم مەبەستە، دەستەیەکی دادوەری دامەزراوە، هەروەها ئەنجوومەنی باڵای دادوەری سەرپەرشتی دەکات و بەپێی تاوانەکانیان سزا دەدرێن، بەڵام بە ئاگاداریی لایەنی دیبلۆماسی لەگەڵ هاوپەیمانیی نێودەوڵەتی دەبێت، بۆئەوەی هەموو وڵاتان ئەو زیندانییانە وەربگرنەوە کە هەڵگری ناسنامەی ئەو وڵاتانەن.