سی ئای ئەی هەڵمەتێکی نوێ بۆ ڕاکێشانی ئەفسەرانی سوپای چین دەستپێدەکات

ئاڤا نیوز 

تەنها چەند هەفتەیەک دوای دوورخستنەوە و پاکتاوکردنی ژەنەراڵە باڵاکانی چین، دەزگای هەواڵگریی ناوەندیی ئەمریکا (سی ئای ئەی) هەوڵەکانی چڕکردووەتەوە بۆ سوودوەرگرتن لەو ئاڵۆزییە ناوخۆییانەی سوپای ئەو وڵاتە و لە ڕێگەی ڤیدیۆیەکی نوێوە داوا لە ئەفسەرانی چین دەکات ببنە سەرچاوەی زانیاری بۆ واشنتن.

بۆچی گرنگە: ئەم هەنگاوە نوێترین هەوڵی ئەمریکایە بۆ بەهێزکردنی هەواڵگریی وڵاتەکەی لە ناو جەرگەی ڕکابەرە ستراتیژییەکەیدا.

چیرۆکی سەرەکی: دەزگای هەواڵگریی سی ئای ئەی ڤیدیۆیەکی نوێی لە ئەکاونتەکانی خۆیان بە زمانی چینی بڵاوکردەوە، تێیدا ئەفسەرێکی سوپای چین نیشان دەدرێت کە لە سیستەمی وڵاتەکەی نائومێد بووە.

- لە ڤیدیۆکەدا، ئەفسەرەکە دەڵێت، هەر کەسێک خاوەن سیفەتی سەرکردایەتی بێت، گومانی لێ دەکرێت و بە بێبەزەیی لەناو دەبرێت. هەروەها ئاماژە بەوە دەکات، دەسەڵاتی سەرەوەی ئەوان لەسەر ناڕاستی بونیادنراوە.

زانیاریی زیاتر: سی ئای ئەی لەسەر ڤیدیۆکە نووسیویەتی، دڵنیایە لەوەی ئەم پەیامانە دەگەنە دەست کەسانی مەبەستدار لە ناو چین، سەرەڕای ئەو سانسۆرە توندەی لەو وڵاتە لەسەر ئینتەرنێت هەیە.

ئەوەی لەبارەیەوە دەگوترێت: بەرپرسێکی سی ئای ئەی کە نەیوستووە ناوەکەی ئاشکرا بکرێت دەڵێت، ڤیدیۆکانی پێشوویان ملیۆنان بینەری هەبووە و بوونەتە هۆی پەیداکردنی سەرچاوەی نوێی هەواڵگری.

لایەنی بەرامبەر: لە بەرامبەردا، چینیش بەردەوامە لە هەوڵەکانی بۆ ڕاکێشانی فەرمانبەرانی ئێستا و پێشووی حکومەتی ئەمریکا و بەشێک لەوانەش لە ئەمریکا ئاشکرابوون و دەستگیرکراون.

ئەوەی پێویستە بیزانیت: ئەم هەوڵە نوێیەی ئەمریکا بۆ بونیادنانەوەی تۆڕە سیخوڕییەکانیەتی لە ناو چین، دوای ئەوەی لە نێوان ساڵانی 2010 بۆ 2012 حکومەتی پەکین توانی گورزێکی کوشندە لە دەزگای هەواڵگریی ئەمریکا بوەشێنێت و بەکۆمەڵ سەرچاوە و سیخوڕەکانی ئەمریکا لەو وڵاتەدا بکوژێت یان زیندانییان بکات.