کۆبوونەوەی مەزڵووم عەبدی، ئیلهام ئەحمەد و ئەسعەد شەیبانی لەگەڵ مارکۆ ڕۆبیۆ کۆتایی هات

ئاڤا نیوز

لە پەراوێزی کۆنفرانسی ئاسایشی میونشن، مەزڵووم عەبدی، فەرماندەی گشتی هەسەدە، ئیلهام ئەحمەد، هاوسەرۆکی بەڕێوەبەرایەتیی پەیوەندییەکانی دەرەوە لە ئیدارەی خۆسەر و ئەسعەد شەیبانی، وەزیری دەرەوەی سووریا لەگەڵ مارکۆ ڕۆبیۆ، وەزیری دەرەوەی ئەمریکا کۆبوونەوە و تاوتوێی ڕێککەوتنەکان و دۆخی سووریا و ڕۆژئاڤا کرا.

چیرۆکی سەرەکی: کۆنفراسی ئاسایشی میونشن، ئەمڕۆ هەینی دەستیپێکردووە و تاوەکو 15ـی مانگ بەردەوام دەبێت. یەکەمجارە لەسەر ئاستی دەرەوە شاندی هەسەدە و ئیدارەی خۆسەر هاوشان لەگەڵ حکومەتی دیمەشق بەشداری کۆبوونەوەیەکی باڵا دەکات.

زانیاریی بەدەستهاتوو: بەگوێرەی میدکانی ڕۆژئاوای کوردستان لە میانی دیدارەکەدا، ڕێککەوتنی نێوان هەسەدە و حکومەتی کاتیی دیمەشق و دۆخی سووریا و ڕۆژئاوای کوردستان تاوتوێ کراون.

ڕاگەیێنراوی فەرمی: ناوەندی ڕاگەیاندنی هەسەدە لە ڕاگەیێنراوێکدا دەڵێت: کۆبوونەوە سێ قۆڵییەکە تەواو بوو، کۆبوونەوەکانی مەزڵووم عەبدی و شاندی یاوەری بەردەوام دەبن لە کۆنفرانسی میونشن لە ئەڵمانیا.

٠ مارکۆ ڕۆبیۆ دووپاتی کردەوە، دۆناڵد ترەمپ، سەرۆکی ئەمریکا پرسی سووریا و پرۆسەی یەکگرتن و جێبەجێکردنی ڕێککەوتنەکان و بەرەنگاربوونەوەی تیرۆر لە سەرووی کارە لەپێشینەکانی خۆیەوە دادەنێت.

ناوەندی ڕاگەیاندنی هەسەدە گرتە ڤیدیۆیەکی بڵاوکردەوەتەوە. مەزڵووم عەبدی و ئیلهام ئەحمەد و ئەسعەد شەیبانی وەستاون، دەردەکەوێت هەر سێکیان خۆشحاڵن.

لەلایەکی دیکەوە: دوای  کۆبوونەوەکە، وەزارەتی دەرەوەی سووریا ڕایگەیاند: لە دیدارەکەدا دیارترین پێشهاتە هەرێمایەتی و نێودەوڵەتییەکان تاوتوێ کران و یەکگرتوویی و سەروەریی سووریا دووپاتکراوە، ئەمریکا پشتگیریی خۆی بۆ ڕێککەوتنی نێوان هەسەدە و حکومەتی سووریا دووپات کردەوە.