قەیرانی سووتەمەنی گەشتە ئاسمانییەکانی فڕۆکەخانەی نەجەفی پەکخست

ئاڤا نیوز

هێڵی ئاسمانیی عێراقی بەهۆی نەمانی سووتەمەنی، گەشتەکانی فڕۆکەخانەی نەجەفی بۆ فڕۆکەخانەی نێودەوڵەتیی بەغدا گواستەوە.

چیرۆکی سەرەکی: بەهۆی قەیرانی سووتەمەنی و نەبوونی بەنزینەوە، گەشتەكانی فڕۆكەخانەی نەجەف بە شێوەیەكی كاتی بۆ فڕۆكەخانەی نێودەوڵەتیی بەغدا گوازراونەتەوە و هێڵی ئاسمانیی عێراقیش لە ئاگادارییەکدا ئەم هەواڵەی پشتڕاست کردووەتەوە.

زانیاریی زیاتر: ئەمە لە کاتێکدایە کە لە چەند ڕۆژی ڕابردوودا، لە وێستگەکانی سووتەمەنی لە چەند پارێزگایەکی عێراق، بەهۆی کەمبوونەوەی بەنزین، بە سەدان ئۆتۆمبێل سەرەیان گرتووە و ئەمەش نیگەرانیی زۆری لێکەوتووەتەوە.

لێدوانی فەرمی: عەبدولساحیب بەزوون حەسناوی، وتەبێژی وەزارەتی نەوت ڕایگەیاند: داوا لە هاووڵاتیان دەکەین دڵنیابن، هیچ قەیرانێکی بەنزین نییە و بەرهەمهێنانی ڕۆژانەمان گەیشتووەتە 30 ملیۆن لیتر؛ هۆکاری قەرەباڵغییەکان تەنیا بۆ زیادبوونی بەرچاوی ژمارەی ئۆتۆمبێلەکان و هاوردەکردنی هەڕەمەکییان دەگەڕێتەوە بەبێ پلانی پێشوەختە.

وەزارەتی نەوت دەشڵێت؛ گۆگاکانیان 145 ملیۆن بەرمیل نەوتیان تێدایە و پارێزراوە، بەڵام کێشەکە لە زۆریی ژمارەی ئۆتۆمبێلەکانە لە شەقامەکاندا.

ئەوەی پێویستە بیزانیت: عێراق سەرەڕای ئەوەی دووەم گەورەترین بەرهەمهێنەری نەوتە لە ناو ڕێکخراوی ئۆپێک (OPEC)، بەڵام ساڵانێکی درێژە بەدەست کەمیی بەرهەمهێنانی ناوخۆیی بەنزین و سووتەمەنیی فڕۆکەوە دەناڵێنێت. زۆربەی پاڵاوگەکانی عێراق کۆن و پەککەوتوون، ئەمەش وای کردووە بەغدا ساڵانە ملیاران دۆلار بۆ هاوردەکردنی سووتەمەنی لە وڵاتانی دراوسێ خەرج بکات.