سەرۆکوەزیران "لە حاڵی حازرا" داهێنانە نامۆکەی سوودانی ڕەخنەباران دەکرێت

ئاڤا نیوز

بڵاوبوونەوەی نووسراوێکی فەرمیی نووسینگەی محەممەد شیاع سوودانی بە نازناوی "سەرۆکوەزیران لە حاڵی حازرا"، شەپۆلێکی ڕەخنەی یاسایی و سیاسیی لە عێراقدا لێکەوتەوە و وەک داهێنانێکی نامۆ لە مێژووی دەوڵەتدا دەبینرێت.

بۆچی گرنگە: بەکارهێنانی دەستەواژەی "لە حاڵی حازرا" بۆ پۆستێکی دەستووریی وەک سەرۆکوەزیران، جۆرێک لە "ناجێگیریی یاسایی" دروست دەکات؛ چونکە نازناوە وەزیفییەکان لە دەستووردا چەسپێنراون و هەر دەستکارییەک تێیاندا مانای وایە خاوەن پۆستەکە خۆی بە "کاتی" دەبینێت یان گومانی لە مانەوەی هەیە. ئەم داهێنانە لە مێژووی 100 ساڵەی عێراقدا وێنەی نەبووە و دەکرێت لە داهاتوودا ببێتە بیانوویەک بۆ تانەدان لەو بڕیارانەی کە بەم نازناوە نوێیە واژۆ دەکرێن.

چیرۆکی سەرەکی: بڵاوبوونەوەی بەڵگەنامەیەکی فەرمی کە لە نووسینگەی محەممەد شیاع سوودانییەوە دەرچووە و ئاراستەی وەزارەتی بازرگانی کراوە، کاردانەوەی توندی لە ناوەندە یاسایی و سیاسییەکاندا لێکەوتەوە.

زانیاتیی زیاتر: بەڵگەنامەکە، کە واژۆی سەڵاح حەسەن، بەڕێوەبەری نووسینگەی سوودانی لەسەرە، تێیدا هاتووە: "بەڕێز محەممەد شیاع سوودانی سەرۆکوەزیران (لە حاڵی حازرا) ڕەزامەندی دەربڕی لەسەر داواکارییەکەتان." ئەم دەستەواژەیە لە هیچ سیستەمێکی سیاسی لە جیهاندا بەکارنەهێنراوە و تەنیا نازناوەکانی وەک (ڕاسپێردراو، کاربەڕێکەر، یان ڕاگوزەر) لە یاسادا ناسراون.

ئەوەی لەبارەیەوە دەگوترێت: ڕەخنەگران دەڵێن ئەم وەسفە هیچ مانایەکی نییە جگە لەوەی سوودانی خۆی گومانی لە ڕەوایی یان مانەوەی خۆی هەیە، و ڕەنگە فەرمانەکانی تەنیا "حاڵی حازر" بگرێتەوە و لە داهاتوودا کاری پێنەکرێت.

ئەوەی پێویستە بیزانیت: لە ڕووی یاساییشەوە، دەستووری ساڵی 2005ـی عێراق بە ڕوونی ناوی پۆستەکان و شێوازی پڕکردنەوەیانی دیاری کردووە و لە هیچ دەقێکی دەستووریدا ڕێگە نەدراوە بە داڕشتنی نازناوە وەزیفییەکان بە ئارەزووی خاوەنەکەی. ئەم هەنگاوە لە کاتێکدایە کە عێراق بە قۆناغێکی سیاسیی هەستیاردا تێدەپەڕێت و پڕۆسەی پێکهێنانی حکومەتی نوێ مشتومڕی زۆری لەسەرە.