لە کوردستان بۆ یەکەمجار پڕۆژەیەک بۆ هاوکاری قوربانییانی ماددە هۆشبەرەکان ڕادەگەیەنرێت

ئاڤا نیوز

كۆنفرانسی نێودەوڵەتیی 'كوردستانێكی بێ ئاڵوودەبوون بە ماددەی هۆشبەر'، بەرپرسانی باڵای هەردوو حکوومەتی فیدراڵ و هەرێمی كوردستان، دەسەڵاتی دادوەری، لایەنە سیاسییەكان، ئاژانسە نێودەوڵەتییەكان، ڕێكخراوە جیهانییەكان و كەسایەتییە ئایینییەكان لە هەولێر كۆدەكاتەوە. بۆ یەكەمجاریش پڕۆژەیەكی گشتگیر بۆ هاوكاریكردنی قوربانیانی ماددە هۆشبەرەكان و كارتێكەرە عەقڵییەكان ڕادەگەیەنرێت.

چیرۆكی سەرەكی: وابڕیارە ڕۆژی یەكشەممە ١٥ـی شوبات، لە شاری هەولێر، كۆنفرانسی نێودەوڵەتیی 'كوردستانێكی بێ ئاڵوودەبوون بە ماددەی هۆشبەر' بەڕێوەبچێت، كە لەلایەن نووسینگەی ڕێكخستنی ڕاسپاردە نێودەوڵەتییەكان، بە پاڵپشتی و هەماهەنگیی هەریەك لە لیژنەی باڵای بەرەنگاربوونەوەی ماددە هۆشبەرەكان و كارتێكەرە عەقڵییەكان و ڕێكخراوی نێودەوڵەتی بۆ مافەكانی مرۆڤ و پەنابەران، ڕێكدەخرێت. بەرپرسانی باڵای حکوومەتی هەرێمی كوردستان و حکوومەتی فیدراڵ، دەسەڵاتی دادوەری، لایەنە سیاسییەكان، ئاژانسەكانی سەر بە نەتەوە یەكگرتووەكان، ڕێكخراوە نێودەوڵەتییەكان و مامۆستایانی ئایینی تێیدا بەشدار دەبن.

لێدوانی فەرمی: دیندار زێباری، بەرپرسی نووسینگەی ڕێکخستنی ڕاسپاردە نێودەوڵەتییەکان لە حکوومەتی هەرێمی كوردستان ڕایگەیاند، کۆنفرانسی “کوردستانێكی بێ ئاڵوودەبوون” تیشک دەخاتە سەر ستراتیژی حکوومەتی هەرێمی کوردستان بۆ بەرەنگاربوونەوەی ماددە هۆشبەرەکان و کارتێکەرە عەقڵییەکان و خستنەڕووی هەوڵەکانی دامودەزگا حکوومییەکان و ئەو ئاڵنگاریی و دەرفەتانەی لەئارادان.

زێباری ئاشكراشی دەكات، لە کۆنفرانسەكەدا پڕۆژەیەکی گشتگیر بە ناونیشانی “النجاة” ڕادەگەیەنرێت، کە هەریەک لە دامودەزگاکانی حکوومەتی هەرێمی کوردستان و لایەنە ناوخۆییە پەیوەندیدارەکان لێی سوودمەند دەبن لە بوارەکانی خۆپارێزی، چارەسەر، پێشکەشکردنی پاڵپشتی دەروونی و کۆمەڵایەتی.

بۆچی گرنگە: دەرئەنجامەكانی کۆنفرانسەكە دەبێتە هەنگاوێکی گرنگ بۆ بەرەنگاربوونەوەی ماددە هۆشبەرەکان، هۆشیارکردنەوەی کۆمەڵگە، دووبارە شیاندنەوەی قوربانییان و خستنەڕووی داواکارییەکان و ئاڵنگارییەکان لەبەردەم کۆمەڵگەی نێودەوڵەتی، بەمەبەستی هاوبەشکردنی ئەزموون و ڕاوێژکاری و پێشکەشکردنی پاڵپشتی لۆجستی و تەکنیکی.