سەرۆک بارزانی: بەبێ پێکهاتەکان بەشداریی هەڵبژاردن ناکەین

ئاڤا نیوز 

 

سەرۆک بارزانی لە نوێترین پەیامیدا لەبارەی هەڵبژاردنی خولی شەشەمی پەرلەمانی کوردستان جەخت دەکاتەوە کە بەبێ پێکهاتەکان بەشداریی هەڵبژاردن ناکەن. 

 

ئەوەی پێویستە بیزانیت: ڕۆژی پێنجشەممە 25-04-2024 سەرۆک مەسعود بارزانی سەڵاحەددین پێشوازی لە قەداسەتی پاتریاک مارئاوای سێیەم، پاتریاكی كەنیسەی ڕۆژهەڵاتی ئاشووری لە جیهان و مەترانەكانی (كۆمەڵەی پیرۆز) كرد.

 

ڕاگەیێنراوی فەرمی: بارەگای بارزانی ناوەڕۆکی دیدارەکەی خستەڕوو، ڕایگەیاند: پاتریاک مارئاوای سێیەم پێزانینی بۆ ڕۆڵی سەرۆک بارزانی هەبوو لە پاڵپشتیكردنی پێكهاتە ئایینیەكانی هەرێمی كوردستان و عێراق و هەروەها سوپاسی كرد بۆ كردنەوەی بارەگای سەرەکیی پاتریاک لە شاری هەولێر كە ئاماژەیەك ڕوونە بۆ پابەندبوونی هەرێمی كوردستان بە پێكەوەژیانی ئایینی. 

 

بابەتی ستراتیژی: مارئاوای سێیەم سوپاسی سەرۆک بارزانی كرد بۆ ئەو هەڵوێستەی لەسەر بڕیاری نادەستووریی دادگەی فیدراڵی بۆ نەهێشتنی كۆتای پێكهاتەكان و ڕایگەیاند كە هەڵوێستی سەرۆك بارزانی نیشانەیە بۆ تێڕوانینێكی مرۆڤدۆستانە و پەرۆشی و وەفایە بۆ پێكەوەژیان و تەبایی لە هەرێمی كوردستان و عێراق.

 

لەلایەکی دیکەوە: سەرۆک بارزانی بوونی فەرهەنگی پێكەوەژیان لە كوردستانی وەک شانازییەكی گەورە وەسف كرد و جەختی كردەوە كە بە هەموو شێوەیەک پارێزگاری لەو فەرهەنگە دەكەین و دەوڵەمەندتری دەكەین. 

 

زانیاریی زیاتر: سەرۆک بارزانی ئاماژەی بە بڕیاری نادەستووریی نەهێشتنی كۆتاكان دا و جەختی کردەوە، بەبێ ڕاستكردنەوەی ئەو هەڵەیە و بەبێ بەشداریی پێكهاتەكان ئامادە نین بەشداریی هەڵبژاردن بكەین، چونكە بێبەشكردنی پێكهاتەكان لێدانە لە بەها مێژووییەكانی گەلەكەمان.