دەنگۆیەک لەسەر پێکوتەی سوورێژە ڕەتدەکرێتەوە

ئاڤا نیوز

 

وەزیری تەندروستی حکومەتی هەرێمی کوردستان ڕایگەیاند ئەو قسانەی لەبارەی پێکوتەی سوورێژە بڵاوکراونەتەوە پڕوپاگەندەی بێ بنەمان، "ئەو كەسەشی پڕوپاگەندەكەی بڵاوكردووەتەوە دەستگیركراوە".

 

چیرۆکی سەرەکی: هاوڵاتییەکی عێراقی لە ڤیدیۆیەکدا قسە لەسەر ئەوە دەکات گوایە لە بەغدا بەتایبەت لەبەشی ڕەسافە و کەرخ 400 هەزار کەس بەهۆی دەرزی كوتان دژی سوورێژە تووشی نەخۆشی ئایدز بوون، لەسەر ئەم ڤیدیۆیە هەردوو وەزارەتی تەتدروستی عێراق و هەرێمی کوردستان دەستیان بە لێکۆڵینەوە کرد.

 

لێدوانی فەرمی: " لە هەولێر لەگەڵ وەزیری تەندروستی عێراق کۆبووینەوەو باسی ئەم بابەتەمان کرد، لەدوای بەدواداچوون دەرکەوت، بابەتی مەترسی دەرزی سوورێژە لەسەر تووشبوون بە نەخۆشی ئایدز دوورە لە ڕاستییەوە و ئەو کەسە لە قسەکانی پاش گەزبووەتەوە و ئێستا دراوەتە دادگە بەمەبەستی لێکۆڵینەوە. د.سامان بەرزنجی، وەزیری تەندروستی حکومەتی هەرێمی کوردسان ئەمەی بە ئاڤا نیوز گوت.

 

ئەوەی پێویستە بیزانیت: پێدانی نامە بە قوتابییان لەلایەن قوتابخانەکانەوە بۆ دایک و باوکان، هیچ پەیوەندی بە مەترسی ئەو دەرزییەوە نییە، تەنیا ڕێكکارێکی یاسایی وەزارەتی پەروەردەیە. وەزیری تەندروستی ئەوەشی گوت.

 

وێنە گەورەكە: ساڵانە لە عێراق و هەرێمی كوردستان، هەڵمەتی كوتان دژی سوورێژە كە نەخۆشییەكی بڵاوی جیهانییە بەڕێوەدەچێت.