وەزیری ئاوەدانکردنەوە: دەیان پڕۆژە لە هەرێمی كوردستان دەستیانپێكردووە

ئاڤا نیوز  

وەزیری ئاوەدانکردنەوە و نیشتەجێکردنی حکومەتی هەرێمی کوردستان ڕایگەیاند، کارەکانی نۆژەنکردنەوە و دەستپێکردنی دەیان پڕۆژە لە هەرێمی کوردستان دەستیان پێکردووە؛ ئێستا وەرزی دەستپێکیی کارەکانە.

لێدوانی فەرمی: دانا عەبدولکەریم، وەزیری ئاوەدانکردنەوە و نیشتەجێکردنی حکومەتی هەرێمی کوردستان لە کۆنگرەیەکی ڕۆژنامەوانییدا گوتی: ئەمڕۆ لە ئیدارەی ڕاپەڕین بەردی بناغەی پڕۆژەی ڕێگای نێوان قەڵادزێ - دارشمانەمان دانا، کە درێژییەکەی 10 کیلۆمەترە و بودجەی پڕۆژەکە دوو ملیار و 800 ملیۆن دینارە.

ژمارەکان وادەڵێن: جووت سایدی ڕانیە – دوکان پرۆژەکە لە سێ قۆناغ پێکدێت؛ قۆناغی یەکەم لە چوارقوڕنە تا پردی هیزۆپ لە 95% کارەکانی تەواو بووە، قۆناغی دووەمی لە پردی هێزۆپ تا خەلەکانە و لە 45%ی تەواوبووە، ئەمساڵ قۆناغی سێیەمی ڕێگەکە دەخرێتە تەندەرکردن و دەست بە جێبەجێکردنی دەکرێت.

ئەوەی ئێستا ڕوودەدات: نۆژەنکردنەوە و جووتسایدکردنی ڕێگەی دەربەندی ڕانیە – ژاراوە لە پلانی کارەکانی وەزارەتی ئاوەدانکردنەوەیە دیزاینیشی ئامادەی و خراوەتە چوارچێوەی قەرزی بانکی نێودەوڵەتیی بۆ هەر کاتێک بانکەکە ڕەزامەندی لە سەر قەرزەکەی کرد و بڕیارەکەی گەڕایەوە عێراق، پرۆژەکە جێبەجێ دەکرێت.