ئامادەکاری بۆ وەرگرتنی گەنمی جووتیاران دەکرێت

ئاڤا نیوز

 

وەزارەتی کشتوکاڵی عێراق ئامادەکاری بۆ وەرگرتنی گەنمی جووتیاران دەکات و بەشێکی زۆری گەنمی هەرێمی کوردستان بە نمرە یەک هەژمار کراوە.

 

وێنە گەورەکە: وەرزی دروێنەی گەنم لە ناوچەی گەرمەسێر دەستی پێ کردووە، شاندێکی عێراق بۆ هەڵسەنگاندنی جۆر و بڕەکەی سەردانی پارێزگاکانی هەرێمی کوردستانیان کرد و لە نزیکەوە بەرهەمەکانیان بەسەر کردەوە.

 

لێدوانی فەرمی: زۆزان کۆچەر، جێگری سەرۆکی لیژنەی کشتوکاڵ لە ئەنجوومەنی نوێنەرانی عێراق بە ئاڤا نیوزی گوت: "شاندەکە لە ڕاپۆرتەکەیاندا بەئەرێنییەوە باسی گەنمی هەرێمی کوردستانیان کردووە و بەشێکی زۆریان بە نمرە یەک ناو بردووە".

 

لەلایەکی دیکەوە: شاندێکی وەزارەتی کشتوکاڵی هەرێمی کوردستان لە بەغدان و لەگەڵ شاندی وەزارەتەکانی کشتوکاڵ و بازرگانیی عێراق لەسەر وەرگرتنی بەرهەمی ئەمساڵی گەنمی جووتیاران گفتوگۆ دەکەن.

 

ئەمەش بزانە: لە ماوەی داهاتوو کۆبوونەوەیەک لەسەر ئاستی باڵا لە ئەنجوومەنی وەزیرانی عێراق دەکرێت، بڕی ئەو گەنمەی ئەمساڵ لە جووتیارانی هەرێمی کوردستان و عێراق وەردەگیرێت دیاری دەکرێت.