هەڵبژاردنی پەرلەمانی کوردستان دوادەخرێت

ئاڤا نیوز 

 

دوای سەردانەکەی شاندی سەرۆکایەتیی هەرێمی کوردستان بۆ بەغدا و گفتوگۆ لەبارەی پرسی هەڵبژاردن، ڕاوێژکارێکی سەرۆکی هەرێمی کوردستان دەڵێت، جارێکی دیکە هەڵبژاردن دوادەخرێت. 

 

وێنە گەورەکە: ڕۆژی 10ـی حوزەیرانی ئەمساڵ بۆ بەڕێوەچوونی هەڵبژاردنەکانی پەرلەمانی کوردستان دیاریکراوە، کۆمیسیۆنیش بەردەوامە لە ئامادەکارییەکانی.

 

لێدوانی فەرمی: لە وەڵامی پرسیاری کوردستان حەسەن، پەیامنێری دیپلۆماسی ئاڤا نیوز لەبارەی ئەوەی ئایا هەڵبژاردنی پەرلەمانی کوردستان دوادەخرێت؟ ڕاوێژکارێکی سەرۆکی هەرێمی کوردستان کە نەیویست ناوی ئاشکرا بکرێت گوتی: "بەڵێ هەڵبژاردن دوادەخرێت، بەڵام ماوەکەی چەندە و بۆ کەی دوادەخرێت بڕیاری لێنەدراوە".

 

هۆکارە زانراوەکان: پارتی و زیاتر لە 10 لایەنی سیاسیی پێکهاتەکان، بەهۆی هەڵوەشاندنەوەی کورسیی پێکهاتەکان، شێوازی بەڕێوەچوونی هەڵبژاردن و کێشەی پەنجەمۆری دەنگدەران ئامادە نین بەم شێوازەی ئێستا بەشداریی هەڵبژاردن بکەن.

 

لەلایەکی دیکەوە: ئایدن مه‌عرووف، وەزیری هەرێم بۆ کاروباری پێکهاتەکان ڕایگه‌یاند، لەگەڵ دواخستنی وادەی هەڵبژاردن، "ئێمە گه‌شبینین كه‌ پرسی كۆتاكان له‌ په‌رله‌مانی كوردستان چاره‌سه‌ر بكرێت".