سەرۆكایەتی هەرێم: هیچ لایەنێک دژی ئەوە نییە پێكهاتەكان نوێنەریان لە پەرلەمانی كوردستان هەبێت

ئاڤا نیوز

سەرۆکایەتی هەرێمی کوردستان سەبارەت بە هەڵبژاردن و یەکلاکردنەوەی پرسی کورسی پێکهاتەکان لە پەرلەمانی کوردستان لەگەڵ لایەنەکان لە پەیوەندیدایە، دڵشاد شەهاب دەڵێت "هیچ لایەنێک دژی ئەوە نییە نوێنەری پێکهاتەکان لە پەرلەمان هەبێت". 

وێنە گەورەکە: نێچیرڤان بارزانی، سەرۆکی هەرێمی کوردستان سێ ڕۆژە لە بەغدایە، لەگەڵ لایەنەکاندا گفتوگۆی لەسەر چەند پرسێک کردووە لەوانەش؛ هەڵبژاردنی پەرلەمانی کوردستان و موچەی مووچەخۆران.

لێدوانی فەرمی: دڵشاد شەهاب، گوتەبێژی سەرۆکایەتی هەرێمی کوردستان بە کوردستان حەسەن پەیامنێری دیپلۆماسی ئاڤا نیوزی گوت: جیاوازی لەسەر شێوازی هەڵبژاردنی نوێنەری پێکهاتەکان و دابەشکردنی کورسییەکانیان هەبووە، بەڵام نابێت ئەم جیاوازیانە ببێتە هۆکاری بێبەشکردنیان لەو مافە.

زانیاریی زیاتر: پێکهاتەکان هەوڵی زۆریان داوە و لەم چەند ڕۆژەی ڕابردووش یاداشتێکیان نووسیوە بۆ هەموو دەسەڵاتەکانی فیدراڵی و هەرێمی کوردستان، لەگەڵ لایەنە سیاسییەکانيش لە پەیوەندیداین و هیچ لایەنێک دژی ئەوە نییە نوێنەری پێکهاتەکان لە پەرلەمانی هەرێمی کوردستاندا هەبێت. دڵشاد شەهاب ئەوەشی گوت.