سەرۆککۆماری عێراق لەسەر کورسیی کۆتاکان پێشنیازێک دەداتە دادگەی فیدراڵی

ئاڤا نیوز

 عەبدوللـەتیف ڕەشید؛ سەرۆککۆماری عێراق، پێشنیازی تەرخانکردنی ژمارەیەکی دیاریکراوی کورسی بۆ پێکهاتەکان دەکات.

 

زانیاریی تایبەت: عەبدولـلەتیف ڕەشید سەرۆککۆماری عێراق، پێشنیازی کردووە کە دادگەی فیدراڵی پێداچوونەوە بە بڕیاری "هەڵوەشاندنەوەی کورسیی کۆتای پێکهاتەکان لە پەرلەمانی کوردستان" بکات.

 

لێدوانی فەرمی: "کریستیانەكان داوا دەکەن بەگوێرەی سیستەمی كۆتا لە پەرلەمانی كوردستان پێنج كورسییەکەی خۆیان بۆ بگەڕێنرێتەوە، لە ئەرمەن و توركمان جیا بكرێنەوە". یونادم  یوسف كەنا، سەرۆکی پارتی بزووتنەوەی دیموكراتی ئاشووری وای بە ئاڤا نیوزی گوت.

 

بۆچی گرنگە: لە هەرێمی کوردستان 133هەزار و 750 کریستیان نیشتەجێن، بەهۆی پەرتبوونی دەنگەکانیش، ئەگەر هەیە کریستیانەکان لە پەرلەمان بێ نوێنەر بن.

 

چارەسەر: کریستیانەكان داوا دەكەن دادگەی فیدراڵی كار بە ماددەی 45ی یاساکەی خۆی بکات بۆ هەموارکردنەوەی بڕیارەكەی.ئەیاد کاکەیی؛ سەرۆکی لقی هەولێری سەندیکای پارێزەرانی کوردستان وای گوت.

 

باكگراوند: دادگەی فیدراڵی عێراق دوای 15 جار دواخستن، 21ی ئەم مانگە پرسی هەڵبژاردنی پەرلەمانی کوردستانی یەکلا کردەوە و لەسەر سکاڵایەکی یەکێتی 11 کورسیی کۆتاکانی هەڵوەشاندەوە.