کریستیانەکان لەگەڵ دواخستنی هەڵبژاردنی پەرلەمانی کوردستانن

ئاڤا نیوز

ئانۆ جەوهەر، سەرۆکی هاوپەیمانیی حامورابی دەڵێت، هەڵوێستی نەگۆڕی پارتی بۆ پشتگیریی پێکهاتەکان بوێرانە بوو، ئەنجامەکەشی بەوە دەبێت گۆرانکاری لە یاسای هەڵبژاردن بکرێت.

لێدوانی فەرمی: ئانۆ جەوهەر، سەرۆکی هاوپەیمانیی حامورابی و وەزیری گواستنەوە و گەیاندنی هەرێمی کوردستان لە پێکهاتەی کریستیانەکان، بە ئاڤا نیوزی ڕاگەیاند: یاسای هەڵبژاردنی کوردستان بەشێوەیەکی ستەمكارانە دادگەی فیدراڵی هەمواری کردووەتەوە، داواکاریمان ئەوەیە مافی ئێمە بچەسپێنرێت، جا بە دواخستنی هەڵبژاردن بێت، یان گەڕاندنەوەی کورسییەکانمان.

زانیاريی تایبەت: پێکهاتەکان هەفتەی ڕابردوو داواکاری خۆیان بە نووسین ڕادەستی سەرۆکی دادگەی فیدراڵی، سەرۆککۆمار، سەرۆکی ئەنجومەنی وەزیرانی عێراق، سەرۆکی هەرێمی کوردستان، سەرۆکی ئەنجومەنی وەزیرانی هەرێمی کوردستان کردووە.

گوشەیەکی دیکەی دیمەنەکە: مادەکانی (49) و (145)، بە ڕوونی باس لەوە دەکات، کە پێکهاتەکانی کۆمەڵگەی عێراقی بەشداری هەڵبژاردن بکەن و نوێنەری خۆیان هەبێت، بەڵام لە هەمواری یاسای هەڵبژاردن کە لەلایەن دادگەی فیدراڵییەوە کراوە، کورسی کۆتاکان لابراوە.

ئەوەی پێویستە بیزانیت: پێکهاتەی کریستیانەکان لەگەڵ دواخستنی هەڵبژاردنی پەرلەمانی کوردستانن، بە هەنگاوێکی دەبینن بۆ چڕکردنەوەی زیاتری هەوڵەکانیان تا کورسییەکانی کۆتای کریستیانەکان بگەڕێننەوە.