یەکێتی: لەگەڵ دواخستنی هەڵبژاردن نین

ئاڤا نیوز

 

مەكتەبی سیاسی یەکێتیی نیشتمانیی کوردستان لەسەر پرسی هەڵبژاردن كۆبووەوە، لە ڕاگەیێنراوی كۆبوونەوەكەشدا ڕەتیدەكاتەوە لەگەڵ دواخستنی هەڵبژاردن بێت و دەشڵێت پەنا بۆ سكاڵای یاسایی و كۆمەڵگەی نێودەوڵەتی دەبات.

ڕاگەیێنراوی فەرمی: مەكتەبی سیاسی كۆبووەوە و بەتووندی ئیدانە و سەرزەنشتی هەر هەوڵێکی تاکڕەوانە و دەنگۆی رێککەوتنی لایەنەکان لەسەر دواخستنی وادەی هەڵبژاردنی پەرلەمانی كوردستان کرد کە بڕیارە لە 10-6-2024 ساز بکرێت".

زانیاریی زیاتر: "هەر هەوڵێک بۆ دواخستنی هەڵبژاردن پێچەوانەی بڕیارەکانی دادگەی فیدراڵی و رێوشوێنەکانی کۆمسیۆنی باڵای هەڵبژاردنە، ئەم جۆرە هەوڵانەی دواخستن بە پاشقولگرتن لە ئیستیحقاقی دیموكراسی دەزانین و هەرگیز بەشێک نابین لە کەینوبەینی ژێربەژێر و پێشوەختیش هەموو کۆبوونەوەیەک بەمەبەستی دواخستنی هەڵبژاردن ڕەتدەکەینەوە".

‎ئەوەی پێویستە بیزانیت: "بە یاداشتی فەرمی و دیداری ڕاشكاو و جددی دۆستانی پرۆسەی سیاسیی کوردستان، عێراق و کۆمەڵی نێودەوڵەتی و نەتەوە یەکگرتووەکانیش لەم پەرۆشییە دیموکراسییەی خۆی ئاگادار دەکاتەوە، ⁠پەنا بۆ سكاڵای یاسایی دەبات". ڕاگەیێنراوی مەكتەبی سیاسی یەكێتی وادەڵێت.

وێنە گەورەكە: بە هۆی ناڕەزایی پارتی دیموكراتی كوردستان و پێكهاتەكان و چەند لایەنێكی دیكە، ئەگەری دواخستنی هەڵبژاردنی پەرلەمانی كوردستان بۆ مانگی 10 هەیە.