ئانۆ جوهەر: دڵنیاین كورسی كۆتاکان دەگەڕێتەوە

ئاڤا نیوز

سەرۆکی هاوپەیمانی حامۆرابی وەستانی ئامادەکارییەکانی کۆمیسیۆنی عێراق بۆ هەڵبژاردنی پەرلەمانی کوردستان، بە هەنگاوێکی ئەرێنیانە دەبینێت، دەڵێت "دڵنیاین کورسی کۆتاکان دەگەڕێتەوە".

وێنە گەورەکە:دادگەی فیدراڵی عێراق کورسی پێکهاتەکانی لە پەرلەمانی کوردستان هەڵوەشاندوەتەوە، پارتی و زیاتر لە 10 لایەنی سیاسی و پێکهاتەکان ئامادە نین بەشداری لە هەڵبژاردندا بکەن و بەوهۆیەوە ڕەنگە هەڵبژاردن دوابخرێت.

لێدوانی فەرمی: ئانۆ جەوهەر، سەرۆکی هاوپەیمانی حامۆڕابی بە ئاڤا نیوزی گوت: وەک پێکهاتەی کلدان، سریان، ئاشووری و ئەرمەن، وەستانی کارەکانی کۆمیسیۆن بۆ هەڵبژاردنی پەرلەمانی کوردستان بە هەنگاوێکی ئەرێنیانە دەبینین، هەر هەڵبژاردنێک بەبێ بەشداری پێکهاتەکان کەموکوڕی هەیە و شەرعیەتی نییە.

زانیاریی زیاتر: نامەیەکمان ئاڕاستەی سەرۆکایەتییەکانی عێراق و هەرێمی کوردستان و یونامی و دادگەی فیدڕاڵی کردووە، داوامان کردووە کورسی کۆتا بۆ پەرلەمانی کوردستان بگەڕێتەوە و دڵنیاین کورسی کۆتا دەگەڕێتەوە. ئانۆ جەوهەر وای گوت.