وەزیری پەروەردە: دووجار لیستی وانەبێژانمان بۆ بەغدا ناردووە

ئاڤا نیوز

وەزیری پەروەردەی حكومەتی هەرێمی كوردستان ڕایگەیاند، دووجار لیستی وانەبێژانیان بۆ بەغدا ناردووە و لە کۆبوونەوە لەگەڵ محەمەد شیاع سوودانی داوای کردووە لە ڕێککەوتنی عێراق و چیندا لە پشکی هەرێمی کوردستان 300 قوتابخانە دروست بکەن.

وێنە گەورەکە: 37 هەزار وانەبێژ لە هەرێمی کوردستان هەن، بەگرێبەستکردنیان ڕێگا خۆش دەکات دەرچووانی دانەمەزراو شوێنیان بگرنەوە.

لێدوانی فەرمی: ئالان حەمە سەعید، وەزیری پەروەردەی حکومەتی هەرێمی کوردستان لە کۆنگرەیەکی ڕۆژنامەوانیدا ڕایگەیاند: "ئەو لێدوانانەی باس لەوە دەکەن کە لیستی وانەبێژان بۆ وەزارەتی دارایی عێراق نەنێردراوە ڕاست نییە، ئێمە دووجار لیستەکەمان ناردووە".

زانیاریی زیاتر: "لە کۆبوونەوە لەگەڵ سوودانیدا پێم گوتووە، پێویستە هەموو ئەو شایستانەی وانەبێژانی عێراق هەیانە، وانەبێژانی هەرێمی کوردستانیش بگرێتەوە، جگە لەوەش من بە نووسراو و سیدی و فلاشیش داتای وانەبێژانم داوەتە دەست سەرۆکوەزیرانی عێراق و ئێمە چاوەڕێی وەڵامین". وەزیری پەروەردە وا دەڵێت.

ئەوەی پێویستە بیزانیت: لە ئەگەری گرێبەستکردنی وانەبێژان، ئەوانەی بڕوانامەی بەکالۆریۆسیان هەیە، مووچەکەیان دەبێتە 500 هەزار دیناری جێگیر و بڕوانامەی دیبلۆمیش، مووچەکەیان دەبێتە 450 هەزار دینار.