لایەنەکانی کەرکووک ڕێک نەکەون عەرەبێکی شیعە دەکرێتە پارێزگار

ئاڤا نیوز

 

سەرۆکوەزیرانی عێراق دوایین مۆڵەت دەداتە لایەنەکانی کەرکووک بۆ ئەوەی لەسەر پۆستی پارێزگاری کەرکووک ڕێک بکەون، ئەگەرنا خۆی کەسێک بۆ ئەو پۆستە دەستنیشان دەکات.

 

وێنە گەورەکە: ڕێکنەکەوتنی لایەنە براوەکانی هەڵبژاردنی ئەنجوومەنی پارێزگای کەرکووک لەسەر دانانی کەسێک بۆ پۆستی پارێزگار، خەریکە پێدەنێتە قۆناغێکی قوورسەوە کە بەدڵی لایەنە براوەکانی ئەنجوومەنی پارێزگاکە نییە.

 

لێدوانە فەرمییەکان: عەزام حەمدانی، ئەندام لە هاوپەیمانی عەزم بە ئاڤا نیوزی ڕایگەیاند: "ڕەنگە دەستوەردانی حکومەتی ناوەندی ڕووبدات بەدەستنیشانکردنی کەسێک بۆ ئیدارەدانی ئەم پارێزگایە، لەوانەشە وەکو فشارێک بێت بۆ هێزە سیاسییەکان بۆ ئەوەی بە زوویی پارێزگارێک هەڵبژێرن".

 

لەلایەکی دیکەوە: قەحتان وەنداوی، لێپرسراوی لقی کەرکووکی بەرەی تورکمانی پێیوایە چارەسەر بۆ دابەشکردنی پۆستی پارێزگاری کەرکووک ئەوەیە "بەشێوەی خوول لە نێوان نەتەوەکان" بێت و دەڵێت: "ئێمەش وەکو تورکمان مافمان هەیە ئەو پۆستە وەربگرین".

 

زانیاریی تایبەت: سەرۆکوەزیرانی عێراق ڕایگەیاندووە، ئەگەر بێتو لە کۆبوونەوەی ئایندە لەسەر پۆستی پارێزگار نەگەنە ڕێککەوتن، ئەوا خۆی کەسێک دادەنێت. ئەو کەسەش عەرەبێکی شیعە مەزهەبە.

 

ئەوەی لەوبارەیەوە دەگوتریت: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە ئاڤا نیوزی ڕایگەیاند: "قسەی سەرەتاو کۆتاییمان ڕێککەوتنێکە ڕەزامەندی سەرجەم لایەنەکانی لەسەر بێت". هاوکات گەیلان قادر، پەرلەمانتاری یەکێتی لە عێراق ڕایگەیاند: "یەکێتی دەیەوێت لە ڕێی ئەندامانی خۆیەوە لە پەرلەمانی عیراق ڕێگر بێت لە دانانی کەسێک لەلایەن سەرۆکوەزیران".