هەڤاڵ ئەبوبەکر بۆ ئاڤا: خوایە هەولێر بپارێزیت

ئاڤا نیوز

 

ئەمشەو بازاڕی قەیسەری هەولێر ئاگری تێبەربوو و نزیکەی سێ کاتژمێری خایاند تا ئاگرەکە لە لایەن هێزەکانی بەرگری شارستانی و هێزە ئەمنییەکانەوە کۆنتڕۆڵ کرا.

 

لێدوانی تایبەت: هەڤاڵ ئەبوبەکر، پارێزگاری سلێمانی لەبارەی ئاگرەکەی بازاڕی قەیسەری بە ئاڤا نیوزی گوت: "خودایە هەولێر بپارێزیت؛ پارێزگاری هەولێرمان دڵنیا کردووەتەوە، وەک پارێزگای سلێمانی ئامادەی هەموو هاوکاری، بەشداریی و هەماهەنگییەکین".

 

 لێدوانی فەرمی: پارێزگاری هەولێر گوتی: "جەنابی سەرۆکوەزیران بارزانی بەردەوام لەسەر هێڵ بوو و نیگەران بوو لەو ڕووداوە و هەموومانی ڕاسپارد بە هەر شێوەیەک بووە نەهێڵین زەرەرێکی زۆر بەر دووکانداران بکەوێت". ئومێد خۆشناو باسیشی لەوە کرد کە زۆربەی بەرپرسانی حکومی و وەزیرەکان و پارێزگار و سەرپەرشتیارانی ئیدارە سەربەخۆکان لەسەر هێڵ بوون و هاوخەمی و ئامادەیی خۆشیان دەربڕیوە، بۆیە "لێرەوە سوپاسیان دەکەین".

 

زانیاری زیاتر: پارێزگاری هەولێر باسی لەوەش کرد: چەند خوولەک بەر لە ئێستا بەڕێوەبەری بەرگریی شارستانی لە نێو دووکانە ئاگرگرتووەکان هاتە دەرەوە و گوتی "ئاگرەکە کۆنتڕۆڵ کراوە" و لە ماوەیەکی نزیکدا جەردی هەموو خەسارەکان دەکەین و هۆکارەکانی ئاگرکەوتنەوەکە ڕادەگەیەنین.