ئومێد خۆشناو: جەنابی سەرۆکوەزیران زۆر نیگەران بوو و بەردەوام لەسەر هێڵ بوو

ئاڤا نیوز

 

دوای کەوتنەوەی ئاگرەکەی بازاڕی قەیسەری هەولێر، ئومێد خۆشناوی پارێزگار لە کۆنگرەیەکی ڕۆژنامەنووسیدا گوتی، سەرۆکوەزیران بارزانی زۆر نیگەران بووە لەبارەی ڕوودانی کارەساتەکە و بەردەوام لەسەر هێڵیش بووە تاوەکو بە خێرایی ئاگرەکە کۆنتڕۆڵ بکرێت.

لێدوانی فەرمی: ئومێد خۆشناو، پارێزگاری هەولێر لەسەر ڕووداوەکە بۆ ڕاگەیاندنەکان گوتی: هەر زوو تیمەکانی بەرگری شارستانی و شارەوانی و تەندروستی و ناوەندەکانی قەیرانەکان و هاتوچۆ و ئاسایش و هێزەکانی زێرەڤانی هەمووی ئامادە بوون و هەوڵی کۆنتڕۆڵی ئاگرەکەیان دا.

 

 هۆکارە زانراوەکان: پارێزگاری هەولێر لەسەر هۆکارەکانی کەوتنەوەکەی ئاگرەکە گوتی بەشێک لە دووکانداران بە پەردە دووکان و کەلوپەلەکانیان دادەپۆشن و تەشەنەکردنی ئاگرەکە بەشێکی بەهۆی ئەمەوە بوو و تەسکی شوێنەکە و قەرەباڵخی خەڵک و میدیاکاران کۆنتڕۆڵکردنەکەی زەحمەت کرد.

 

زانیاری زیاتر: پارێزگاری هەولێر باسی لەوەش کرد: چەند خولەک بەر لە ئێستا بەڕێوەبەری بەرگریی شارستانی لە نێو دووکانە ئاگرگرتووەکان هاتە دەرەوە و گوتی "ئاگرەکە کۆنتڕۆڵ کراوە" و لە ماوەیەکی نزیکدا جەردی هەموو خەسارەکان دەکەین و هۆکارەکانی ئاگرکەوتنەوەکە ڕادەگەیەنین.

 

باکگراوەند: ئەمڕۆ کاتژمير نۆی شەو ئاگر لە بازاڕی قەیسەری هەولێر کەوتەوە و زیاتر لە سێ کاتژمێری خایاند تا ئاگرەکە کۆنتڕۆڵ کرا و چەندین دووکانی قووماشفرۆشان سووتان.