سێ سەربازی ئەمریکی لە هێرشێک بۆ سەر هێزەکانیان لە ئوردن دەکوژرێن

ئاڤا دیجیتاڵ

سێ سەربازی ئەمریكی لە ئوردن كوژران و دەیان سەربازیش برینداربوون، پێنتاگۆن بە پێشهاتێكی مەترسیدار ناویدەبات، سەرۆكی ئەمریكاش هەڕەشەی تۆڵەسەندنەوە دەكات و دەڵێت "دەزانين كێ هێرشەكەی ئەنجامداوە".

چیرۆكی سەرەكی: پێنتاگۆن  رایگەیاند، لە هێرشێكی فڕۆكەی بێفڕۆكەوان بۆ سەر بنكەیەك لە ئوردن سێ سەربازی ئەمریكی كوژراون و 25 سەربازیش برینداربوون، ئەمەش بۆ یەكەمجارە ئەندامانی هێزەكانی ئەمریكا لەو وڵاتە بكرێنە ئامانج.

لێدوانی فەرمی: جۆبایدن سەرۆكی ئەمریكا لە وەڵامی ئەو هێرشەدا، بەڵێنی تۆڵەسەندنەوە دەدات و دەڵێت "گومانتان نەبێت  ئێمە لە كاتێكدا و بە شێوەیەك كە ئێمە هەڵیدەبژێرین، لێپرسینەوە لە هەموو ئەو كەسانە دەكەین كە بەرپرسن لەو هێرشانە."

 

لەلایەكی دیكەوە: گوتەبێژێك بەناوی حكومەتی ئوردن ڕەتیدەكاتەوە هێرشەكە لەناو خاكی ئوردن ئەنجام درابێت و دەڵێت " هێرشەكە لەبنكەی "تەنەف" بووە لەسەر سنووری سووریا و ناكەوێتە خاكی ئوردنەوە".

 

" لە كاتێكدا ئێمە هێشتا لێكۆڵینەوە لە دۆزینەوەی كەسی بەرپرس لەم هێرشە دەكەین، بەڵام  دەزانین كە ئەم هێرشە لەلایەن گروپە چەكدارە توندڕەوەكانی سەر بە ئێرانەوە ئەنجامدراوە كە لە  سوریا و عێراق چالاكییان هەیە". جۆ بایدن وای گوت.

 

هاوكات سەرۆک ئەرکان و دەزگای هەواڵگری ئەمریکا لە واشنتن لە کۆبوونەوەیەکی بەپەلەدان بۆ لێکۆڵینەوە لە رووداوەکە.

 

باكگراوند: لە 17 ی ئۆكتۆبەری ساڵی ڕابردووەوە، تا ڕۆژی هەینی زیاتر لە 158 جار هێرشكراوەتە سەر هێزەكانی ئەمریكا و هاوپەیمانانی لە عێراق و سوریا.