سه‌رۆكی هه‌رێمی كوردستان فه‌رمانی به‌قه‌زاكردنی خورماڵ واژۆ ده‌كات

ئاڤا نیوز

 

دوای ئەوەی سەرۆکوەزیران بارزانی ڕێکەوتی 30 ی تەممووزی 2023، بڕیاری بەقەزاکردنی ناحیەی خورماڵی لە پارێزگای هەڵەبجە دا، ئەمڕۆ پێنجشەممە نێچیرڤان بارزانی سه‌رۆکی هه‌رێمی کوردستان، فه‌رمانی هه‌رێمی بۆ به‌قه‌زاکردنی خورماڵ واژۆ کرد.

 

ئەوەی پێویستە بیزانیت: نێچیرڤان بارزانی سەرۆکی هەرێمی کوردستان، "پاڵپشت به‌ یاسای سه‌رۆکایه‌تیی هه‌رێمی کوردستان، ژماره‌ یەکی ساڵی 2005ی هه‌موارکراو و له‌به‌ر ڕۆشناییی داواکاریی ئه‌نجوومه‌نی وه‌زیرانی هه‌رێمی کوردستان، بڕیاری دا به‌ هێنانه‌کایه‌ی قه‌زای خورماڵ له‌ سنووری پارێزگای هه‌ڵه‌بجه‌ به‌ هه‌مان سنووری ئێستای ناحیه‌ی خورماڵ".

 

زانیاریی زیاتر: ئه‌م بڕیاره‌ی سه‌رۆکی هه‌رێمی کوردستان، له‌مڕۆوه‌ جێبه‌جێ ده‌کرێت و هه‌موو ڕێکاره‌ ئیدارییه‌کان بۆ ئه‌م مه‌به‌سته‌ ده‌ست پێ ده‌که‌ن.

 

کاریگەری و گرنگییەکەی: خورماڵ لە 46 گوند پێک دێت و ژمارەی دانیشتووانی زیاترە لە 18 هەزار کەس، بەقەزابوونی ده‌بێته‌ هۆی باشتربوونی ڕه‌وشی ناوچه‌که‌ له‌ڕووی خزمه‌تگوزاری و کارگێڕییه‌وه‌ و خزمه‌تی زیاتر به‌ خه‌ڵک و هاووڵاتیانی ده‌کات. 

 

باکگراوند: دوای ئەوەی خەڵکی ناحیەی خورماڵ، لە ڕێگەی چالاکیی مەدەنی و کەمپەینەوە، داواکاریی بەقەزاکردنی ناحیەکەیان بۆ سەرۆکایەتیی حکومەتی هەرێمی کوردستان بەرز کردەوە، سەرۆکوەزیران بارزانی، فەرمانی بە وەزارەتی ناوخۆ کرد، هەماهەنگ لەگەڵ پارێزگای هەڵەبجە، دەست بە ڕێکارە کارگێڕییەکان بکەن و ئامادەکارییەکان بۆ هێنانەکایەی قەزای خورماڵ تەواو بکەن.