دەست بە ڕێکخستنەوەی سەرجەم بازاڕەکانی هەولێر دەکرێت

ئاڤا نیوز

بۆ جێبەجێکردنی فەرمان و ڕاسپاردەکانی سەرۆکوەزیران بارزانی، لەبارەی ڕووداوی ئاگرکەوتنەکان، بە سەرپەرشتی وەزیرانی ناوخۆ، شارەوانی و پارێزگاری هەولێر، کۆبوونەوەیەکی فراوان بەڕێوەچوو. لایەنەکان ڕاسپێردران دەست بە جێبەجێکردنی ڕێکخستنەوەی سەرجەم بازاڕەکان بکەن.

وێنە گەورەکە: پێشتر سەرۆکوەزیران بارزانی، لایەنە پەیوەندیدارەکانی ڕاسپاردبوو بە زووترین کات، لێکۆڵینەوەی ورد و هەمەلایەنە بکەن بۆ دەستنیشانکردنی هۆکارەکانی دووبارەبوونەوەی ئاگرکەوتنەوەکان بۆ ئەوەی بزانرێت ئایا بەهۆی کەمتەرخەمی و پابەندنەبوون بە ڕێنماییەکان بووە یان دەستێکی خراپەکاری لە پشتە.

ڕاگەیێنراوی فەرمی: لە کۆبوونەوەکەدا، تیشک خرایە سەر بڕیار و ڕاسپاردەکانی کۆبوونەوەی پێشووتر و بەدواداچوون لە جێبەجێکردنی بڕیارەکان کرایەوە، کە دەبێت سەرجەم بڕیارەکان وەکو خۆی جێبەجێبکرێت.

زانیاریی زیاتر: لایەنەکان ڕاسپێردران دەستبکەن بە ڕێکخستنەوەی سەرتاسەری بازاڕی قەیسەری و سەرجەم بازاڕە میللیەکان و شوێنە گشتییەکان و هەڵگرتنی سەرپێچی و زێدەڕۆییەکان و هەموو ئەو مەترسیانە کە دەبنە هۆکاری دروستبوونی ڕووداوی لەمشێوەیە، بە تایبەتی نەهێڵانی هەڵواسینی پەردە لە دووکانەکان.

لە لایەکی دیکەوە: بەرگريی شارستانی و قایمقامیەتی ناوەندی و سەرۆکایەتی شارەوانی ڕاسپێردران پێداچوونەوە بەو سیستەمانە بکرێت کە جێگیر کراون.