پێشانگەکەی هونەرمەند ناشاد دوادەخرێت

ئاڤا نیوز

بڕیار وابوو بە سەرپەرشتیی بەڕێوەبەرایەتیی چاودێریی کۆمەڵایەتیی سلێمانی، ئەمڕۆ لە خانەی بەساڵاچووانی سیتەک، 100 تابلۆی هونەرمەندی کۆچکردوو محەمەد سابیر ناسراو بە ناشاد نمایش بکرێت، بەڵام دواخرا.

 
ئەوەی پێویستە  بیزانیت: چەند ڕۆژ بەر لە ئێستا هونەرمەند ناشاد کۆچی دوایی کرد و پێڕانەگەیشت خۆی پێشانگە بۆ تابلۆ نوێکانی بکاتەوە، بۆیە بڕیار درا ئەمڕۆ شەممە پێشانگاکە بکرێتەوە، کەچی دواخرا. ژیار جەلال بەڕێوەبەری چاودێریی کۆمەڵایەتیی سلێمانی بە ئاڤا نیوزی گوت: ئێمە لە پرسەی هونەرمەند تابلۆکانمان نمایش کرد و بۆ دووبارە نمایشکردنەوەیان پێویستە کاری زیاتری لەسەر بکەین.

باگکراوند: محەمەد سابیر ناسراو بە ناشاد، لە ساڵی 1954 لە شاری سلێمانی لەدایک بووە و زیاتر لە پێنج دەیە بوو سەرقاڵی وێنەكێشان بوو. پێشتر لەناو كارگەی كولتوری سلێمانی دەژیا، بەڵام لەم دواییانەدا چووە خانەی بەساڵاچوانی سلێمانی و لە حەوتی ئایاری ئەمساڵ لە شاری سلێمانی بە نەخۆشی شێرپەنجە و لە نەخۆشخانەی شار لە سلێمانی کۆچی دوایی کرد.