حكومەتی عێراق: لە ئیدارەدانی كێشەكان لەگەڵ هەرێمی کوردستان سەركەوتوو بووین

ئاڤا نیوز

 

گوتەبێژی حكومەتی عێراق باسی ئیدارەدانی كێشەكان لەگەڵ هەرێمی كوردستان و كۆتاییهێنانی ئەركی یۆنامی لە عێراق دەكات، دەڵێت "حکومەت سەرکەوتوو بوو لە ئیدارەدانی دۆسیەی کەرکووک و پەیوەندی لەگەڵ هەرێمی کوردستان".

وێنە گەورەكە: هەرێمی كوردستان و حكومەتی عێراق بەرەو چارەسەركردنی كێشە هەڵپەسێردراوەكانی نێوانیان هەنگاو دەنێن و سەرۆكوەزیران بارزانی و سەرۆكوەزیرانی عێراق دەستپێشخەرییان كردووە، بەڵام هێشتا عێراق لە ناردنی شایستە داراییەكانی هەرێمی كوردستان جددی نییە.

لێدوانی فەرمی: باسم عەوادی ـ گوتەبێژی حکومەتی عێراق ڕایگەیاند: حکومەت سەرکەوتوو بوو لە ئیدارەدانی هەندێک دۆسیەی هەستیار، وەکو دۆسیەی کەرکووک و پەیوەندی لەگەڵ هەرێمی کوردستان، حکومەت دەستپێشخەری کردووە بۆ چارەسەرکردنی کێشە سیاسییەکان کە بەشێکیان ئەرکی یۆنامی بوون لە عێراق.

زانیاریی زیاتر: کۆتاییهێنان بە کاری یۆنامی لە عێراق، لەسەر داوای بەغدا بووە و  کۆتاییهێنان بە کاری سیاسی یۆنامی لە عێراق نابێتە ڕێگر لە بەردەوامیی کاری ئاژانسە نێودەوڵەتییە مرۆییەکان لە عێراق.

ئەوەی پێویستە بیزانیت: محەممەد شیاع سوودانی، سەرۆکوەزیرانی عێراق نامەیەکی بۆ کۆتاییهێنان بە ئەرکی یۆنامی ئاراستەی سکرتێری گشتیی نەتەوە یەکگرتووەکان کردووە و تێیدا هاتووە: "پێویستمان بە ئەرکی یۆنامی نەماوە و داوا دەکەین لە 31ـی کانوونی یەکەمی 2025 کۆتایی بە ئەرکی یونامی بهێنرێت".