ڕوونکردنەوەیەک لەبارەی گرێبەستی "نهێنی" لە هەژماری من دەدرێت

ئاڤا نیوز

 

جێگری به‌ڕێوه‌به‌ری نووسینگه‌ی سه‌رۆكوه‌زیرانی هه‌رێمی كوردستان ڕایگەیاند، لە پڕۆژەی "هەژماری من"ـدا هیچ گرێبەستێکی نهێنی و شاراوە بە مووچەخۆر واژۆ ناکرێت و هەر زانیارییەکی ناڕاست لەبارەی ئەم بابەتە بڵاو بکرێتەوە بۆ "سەرلێشێواندنە."

 

بۆچی گرنگە: لە ڕێگەی پڕۆژەی هەژماری منەوە مووچەخۆران جگە لە وەرگرتنی مووچە، لە 19 خزمەتگوزاریی بانکی و چەندین جۆری قەرز و پێشینە سوودمەند دەبن، پڕۆژەکەش ڕێگری لە سپیکردنەوەی پارە دەکات و گەندەڵی کەم دەکاتەوە.

 

لێدوانی فەرمی: عەزیز ئەحمەد، جێگری بەڕێوەبەری نووسینگەی سەرۆکوەزیرانی هەرێمی کوردستان لە هەژماری خۆی لە پلاتفۆڕمی ئێکس نوسیوویەتی: هیچ بڕە پارەیەک لە هەژمارەکەت نابڕدرێت، هیچ گرێبەستێکی نهێنی و شاراوەت پێ واژۆ ناکرێت، هیچ سنوورێکیش لەسەر بڕی ڕاکێشراوی پارەکەت نییە.

 

زانیاری زیاتر: "هەر لایەنێک کە بانگەشەی پێچەوانەی ئەم ڕاستییانە دەکات بەدوای سەرلێشێواندن و بڵاوکردنەوەی زانیاری نادروستە و  پێویست بەمە ناکات و ئێمە لێرەین، پرسیارەکانتان ئاراستەی ئێمە بکەن بۆ دۆزینەوەی ڕاستییەکان"، عەزیز ئەحمەد وای نووسیوە.