بە سەرپەرشتیی سەرۆکوەزیران بارزانی ئەنجوومەنی باڵای دەستەی متمانەبەخشین کۆبووەوە

ئاڤا نیوز

 

سەرۆکوەزیران بارزانی سەرپەرشتیی یەکەمین کۆبوونەوەی ئەنجوومەنی باڵای  دەستەی متمانەبەخشین بە دامەزراوەكان و پڕۆگرامەكانی پەروەردە و خوێندنی باڵای لە هەرێمی کوردستان کرد.

 

وێنە گەورەکە: لە دوای ئەوەی یاسای ئەنجوومەنی باڵا و پەیڕەوی ناوخۆ کەوتە بواری جێبەجێکردن، ئەنجومەنی باڵای  دەستەی متمانەبەخشین بە دامەزراوەكان و پڕۆگرامەكانی پەروەردە و خوێندنی باڵا لە هەرێمی کوردستان یەکەم کۆبوونەوەی خۆی کرد.

 

ڕاگەیێنراوی فەرمی: "گفتوگۆ لەبارەی ئامانجەکانی ئەنجوومەنەکە کرا کە بریتین لە کارکردن لەپێناوی پاراستنی کوالێتیی پەروەردە و خوێندنی باڵا لە هەرێمی کوردستان لەڕێگەی برەودان بە کولتووری هەڵسەنگاندن بە ڕەچاوکردنی میکانیزم و پێوەرە نێودەوڵەتییەکان".

 

خاڵی ئەرێنی: دوای گفتوگۆ و ڕاگۆڕینەوە، ئەنجوومەنی باڵا بڕیاریدا بە پێکهێنانی دەستەی متمانەبەخشین بە دامەزراوەكان و پڕۆگرامەكانی پەروەردە و خوێندنی باڵا لە هەرێمی کوردستان و دەستنیشانکردنی ئەندامەکانی دەستەکە، پاشان ئەمینداری گشتیی دەستەکە دەستنیشان کرا، پلان و ستراتیژ و سیاسەتی کاری دەستەکە پەسەند کرا.