ئەمریکا: ئێران بۆ ڕزگارکردنی ڕەئیسی داوای هاوکاری لێکردین

ئاڤا نیوز  

وەزارەتی دەرەوەی ئەمریکا ڕایدەگەیێنێت ئێران داوای هاوکاری لێ کردین بۆ ئەوەی یارمەتیان بدەین لە ڕزگارکردنی سەرۆکەکەیان بەڵام "هۆکاری لۆجستی ڕێگر" بوو.

بۆچی گرنگە: دوای کەوتنە خوارەوەی هێلیکۆپتەرەکەی سەرۆککۆماری ئێران، 15 کاتژمێر گەڕانی بێ ئەنجامی دەیان تیمی ئێرانی بەدوای هێلیکۆپتەری سەرۆکی وڵاتەکەیان، ئێران داوای لە تورکیا کرد و ڕایگەیاند کە گەڕانەکە لە توانای ئەوان دەرچووە.

لێدوانی ڕۆژنامەوانی: ماتیو میلەر، گوتەبێژی وەزارەتی دەرەوەی ئەمریکا لە کۆنگرەیەکی ڕۆژنامەوانیدا ڕایگەیاند: ئێران داوای هاوکاری لە واشنتن کرد بۆ ڕزگارکردنی ئیبراهیم ڕەئیسی، بەڵام "بە هۆکاری لۆجستیکی نەمانتوانی ئەوە بکەین".

زانیاریی زیاتر: ماتیو میلەر، گوتی: "ئەمریکا پشتیوانی خۆی بۆ گەلی ئێران و خەباتیان بۆ مافی مرۆڤ دووپات دەکاتەوه". گوتیشی: "مردنی ڕەئیسی هەڵوێستی بنەڕەتی واشنتۆن بەرامبەر ئێران ناگۆڕێت".

لە لایەکی دیکەوە: گوتەبێژی وەزارەتی دەرەوەی ئەمریکا ڕایگەیاند: "بەردەوام دەبین لە ڕووبەڕووبوونەوەی پشتیوانیی ڕژێم لە تیرۆریزم و بڵاوبوونەوەی چەکی مەترسیدار و پێشکەوتنەکانی لە بەرنامە ئەتۆمییەکەیدا بە شێوەیەک کە هیچ پەیوەندییەکی بە ئامانجە مەدەنییەکانی ئەم بەرنامە ناوەکییەوە نییە".