تەقینی بوتڵی کلۆری ئاوی خاس دانیشتووانی گوندێک سەرگەردان دەکات

ئاڤا نیوز

 

نزیکەی 24 کاتژمێر  بەسەر تەقینی یەکێک لە بوتڵەکانی کلۆری ئاوی خاس تێدەپەڕێت و هێشتا چارەسەرنەکراوە، بەڕێوەبەڕی پڕۆژەکە ئاماژە بەوەدەدات، کە "بەهۆی خراپی کوالێتییەوە ئەو بوتڵانە دەتەقن." 

 

وێنە گەورەکە: لە ماوەی كەمتر لە 20 ڕۆژدا دووجار بوتڵی غازی كلۆر تووشی لێچوون دەبێت، نزیکەی 300 کەسی دانیشتووی گوندی بنەوشانی سەرگەردان کردووە و ناچار بوون کە ماڵ و حاڵی خۆیان جێبهێڵن.

 

لێدوانی فەرمی: لەتیف بنەوشەیی، هاووڵاتییەکی دانیشتووی گوندی بنەوشانە بە ئاڤا نیوزی گوت: "بنەوشان 300 مەتر لە پڕۆژەی ئاوی خاس دوورە، هەر جارێک لێچوونی غاز هەبێت، بۆ پاراستنی ژیانی خۆمان ناچار دەبین ماڵ و حاڵی خۆمان چۆڵ بکەین."

 

پێدراوە ڕاستییەکان: غازی کلۆر خنکێنەر و ژەهراوییە، مەترسی لەسەر ژیانی مرۆڤ، گیانلەبەر و ڕووەک دروست دەکات.

 

 لە لایەکی دیکەوە: ئەو بوتڵانەی بۆ هەڵگرتنی غازی کلۆر بەکاردەهێنرێن، ئێرانین و بەهۆی خراپی کوالێتیانەوە دەتەقن.