مردنی ڕەئیسی چەند نهێنییەک لەسەر پەیوەندییە شاراوەکانی ئێران و ئەمریکا دەردەخات

ئاڤا نیوز

دوای گیانلەدەستدانی هەریەکە لە سەرۆککۆمار و وەزیری دەرەوەی ئێران، چەند زانیارییەک سەبارەت بە گفتوگۆ ناڕاستەوخۆ و نهێنییەکانی نێوان ئێران و ئەمریکا ئاشکرا بوون.  

ئەوەی پێویستە بیزانیت: پێگەی 'میدڵ.ئیست.ئای' بڵاوی کردووەتەوە: گفتوگۆکان لە مەسقەتی پایتەختی عومان بەڕێوە چوون. برێت مەکگۆرک ـ ڕاوێژکاری پێشکەوتووی سەرۆکی ئەمریکا بۆ کاروباری ڕۆژهەڵاتی ناوەڕاست، لەگەڵ عەلی باقری کەنی ـ یاریدەدەری سیاسیی وەزارەتی دەرەوەی ئێران،  کۆبوونەوەیان کردووە. مەکگۆرک پێشتریش لەگەڵ سەعید ئیرڤانی، باڵیۆزی ئێران لە نەتەوە یەکگرتووەکان، گفتوگۆی هەبووە. 

زانیاریی بەدەستهاتوو: بە پێی زانیارییە ئاشکرابووەکان، ئێران و ئەمریکا لە ڕێککەوتن لە سەر گۆڕینی حکومەتەکەی نەتانیاهۆ لە ئیسرائیل، کۆتاییهێنان بە شەڕی ئیسرائیل دژی غەززە و  ڕێگریکردن لە تەشەنەسەندنی شەڕەکە بۆ ناوچەکانی دیکەی ڕۆژهەڵاتی ناوڕاست، نزیک کەوتبوونەوە. 

بۆچی گرنگە: مردنی ڕەئیسی و عەبدوڵاهیان، گفتوگۆ نهێنییەکانیان وەستاندووە و بەم پێیەش لەوانەیە نائارامییەکانی ناوچەکەش تا دەستپێکردنەوەی گفتوگۆی نوێ و گەیشتن بە ئەنجام بەردەوام بن.