بەهۆی شۆکی لافاو ئافرەتێک جەڵتە لێی دا و گیانی لەدەست دا

ئاڤا نیوز

دوێنێ شەو مامۆستایەکی ئافرەت لە چەمچەماڵ گیانی لەدەست دا، بە گوتەی هاوسەرەکەی بە چەند ڕۆژێک پێش لافاوەکەی چەمچەماڵ منداڵی بووە و ڕۆژی لافاوەکەش زۆر ترساوە بەوهۆیەوە توشی شۆک بووە و جەڵتە لێی داوە، بەوهۆیەوە شەوی ڕابردوو گیانی لەدەست دا.

 

چیرۆکی سەرەکی: دیار محەممەد، پەیامنێری ئاڤا لە کەرکووک لە پرسەکەدا قسەی لەگەڵ هاوسەری مامۆستا کوردستان قاسم کردووە و ئەویش بە ئاڤای گوت: هاوسەرەکەم سرووشتی وابوو لە هەموو شتێک دەترسا، تازە منداڵی بوو بوو، کاتێک لافاوەکە دروستبوو ئاو هاتە ناو خانووەکەمان، کاتێک کوردستان ئەمەی بینی توشی شۆک بوو زۆر ترسا و ڕای کرد خەریکبوو منداڵەکە لەدەستی  بکەوێتە سەر زەوی خۆم گرتمەوە.

 

-"خێزانەکەم زۆر دەترسا لەوەی ئێمە و منداڵەکەمان لە ئاودا بخنکێین لەو ڕۆژەوە تەندروستی زۆر تێکچوو". گوتیشی، پزیشکەکان پێیان گوتین هاوسەرەکەت فشاری بەرزبووتەوە و جەڵتە لێی داوە.

 

- "تا گیانی لەدەست دا هەر هاواری منداڵەکانی دەکرد، تا دەمرم قەرزاری هاوسەرەکەمم، ئەو بۆ پیشە و خێزانەکە زۆر دڵسۆزبوو."

 

- بەرپرسان بەهانامانەوە نەهاتوون و ئاڤا تاکە کەناڵە لەو کەیسە هات بە دەنگمانەوە.

 

لەلایەکی دیکەوە: مامۆستاکە دوای تێکچوونی دۆخی تەندروستی براوەتە یەکێک لە نەخۆشخانە تایبەتەکانی سلێمانی، ئاڤا پەیوەندی کرد بە کارگێڕیی نەخۆشخانەکە ئەوانیش گوتیان: زانیاری لەسەر نەخۆش بڵاو ناکەینەوە.

 

پەیامنێری ئاڤا قسەی لەگەڵ یەکێک لە پزیشکەکانی ئەو نەخۆشخانەیە کردووە گوتوویەتی: لە ڕووی زانستی پزیشکییەوە هیچ هۆکارێک دەری نەخستووە کە لافاو هۆکاری گیان لەدەست دانی ئەو مامۆستایە بێت بەڵام ئەو ئافرەتە کێشەی فشاری خوێنی هەبووە و ئەوە هۆکارە زانستییەکە بووە.

 

ئەمەش بزانە: مامۆستاکە ناوی کوردستان مەزهەرە و تەمەنی 38 ساڵە بووە، لە گوندی هەشەزن لە قوتابخانەی دووگەردان وەک مامۆستای عەرەبی وانەی دەگوتەوە.

 

باکگراوند: لە 9ی ئەم مانگە لافاو قەزای چەمچەمەڵ، ناحیەکانی تەکیە و شۆڕشی گرتەوە، بەهۆیەوە دوو کەس گیانیان لەدەست دا، ئاو چووە ناو سەدان ماڵ و چەندین قوتابخانە و فەرمانگەی حکومی زیانیان بەرکەوت.