پارتی و یەکێتی لەبارەی چەند پرسێک کۆدەبنەوە

هەواڵ
2024-02-03

شەیری بکە لە:

پارتی و یەکێتی لەبارەی چەند پرسێک کۆدەبنەوە

ئاڤا دیجیتاڵ

هه‌ردوو مه‌كته‌بى سیاسى پارتى و یه‌كێتی رۆژی یەکشەممە لە دەباشان كۆده‌بنه‌وە، بەمەبەستی تاوتوێکردنی چەند پرسێکی گرنگ.

بۆچی گرنگە: پارتی و یەکێتی لە کۆبوونەوەکەدا گفتوگۆ لەبارەی چەند بابەتێکی گرنگ دەکەن، لەوانە؛

* کێشەکانی نێوان هەولێر و بەغدا.

* پرسی مووچە، هەموارکردنەوەی بودجە و هەناردەکردنەوەی نەوت.

* هێرشە بەردەوامەکانی سەر هەرێمی کوردستان.

* پرسى هه‌ڵبژاردنى په‌رله‌مانى كوردستان.

* پرسی پێکهێنانی حکومەتە خۆجێیەکانی کەرکووک و نەینەوا و پۆستی پارێزگاری کەرکووک.

چیرۆکی سەرەکی: لەدوای کۆتاییهاتنی هەڵبژاردنی ئەنجوومەنی پارێزگاکانی عێراق، یەکێتی نامەیەکی بۆ پارتی ناردووە و داوای لە پارتی کردووە کۆببنەوە و هەوڵی رێککەوتن بدەن لەبارەی ئەنجوومەنی پارێزگای کەرکووک و نەینەوا و رێکخستنەوەی نێوماڵی کورد.

ئاڤا میدیا زانیویەتی، ئەمڕۆ شەممە مەکتەبی سیاسی پارتی وەڵامی یەکێتی داوەتەوە و رەزامەندی دەربڕیوە لەسەر کۆبوونەوەکە. کات و شوێنی کۆبوونەوەکە سبەی یەکشەممە 4-2-2024 لە دەباشانی سلێمانی دەبێت.

لێدوانی فەرمی: ئاسۆ مامەند، ئەندامی مەکتەبی سیاسی و لێپرسراوی کەرکووک - سەڵاحەددینی یەکێتیی نیشتمانیی کوردستان بە ئاڤا میدیا گوت؛ لە کۆبوونەوەکەدا گفتوگۆ لەبارەی کۆمەڵێک بابەت دەکرێت، گرنگترینیان پرسی کۆبونەوەی رۆژی دووشەممەی ئەنجوومەنی پارێزگای کەرکووکە.

ئەمەش بزانە: شاندى پارتى پێكهاتوون له‌ (فازڵ میرانى، هۆشیار زێبارى، مەحموود محەممەد، پشتیوان سادق، جەعفەر ئیمینیکی و ژماره‌یه‌كی دیکەی ئه‌ندامى مه‌كته‌بى سیاسى). شاندى یه‌كێتیش پێكهاتووە له‌ (بافڵ تاڵه‌بانى، ده‌رباز كۆسره‌ت ره‌سوڵ، قوباد تاڵه‌بانى، ره‌فعه‌ت عەبدوڵڵا و ئاسۆ مامه‌ند).

گۆشەیەکی دیکە: بڕیاربوو سبەی مەکتەبی سیاسی یەکێتی کۆببێتەوە، بەڵام بەهۆی وەڵامدانەوەی پارتی بۆ نامەکەی یەکێتی کۆبووەنەوەکە دواخراوە. سەعدی پیرە، گوتەبێژی یەکێتی ئەمەی بۆ ئاڤا میدیا پشتڕاستکردەوە.