پارتی و یەکێتی لەبارەی پۆستی پارێزگاری کەرکووک کۆدەبنەوە

ئاڤا دیجیتاڵ 

 

پارتی دیموکراتی کوردستان و یەکێتیی نیشتمانی کوردستان کۆدەبنەوە و  یەکێک لە تەوەرە سەرەکییەکانی کۆبوونەوەکە تاووتوێکردنی پێکهێنانی حکومەتی خۆجێیی کەرکووک و دانانی پارێزگارە، ئەم کۆبوونەوەیە یەکەم کۆبوونەوەی نێوانیان دەبێت لەدوای هەڵبژاردنی ئەنجوومەنی پارێزگای کەرکووک. 

 

وێنە گەورەکە: ڕۆژی 18ـی کانوونی یەکەمی 2023 هەڵبژاردنى ئەنجوومەنى پارێزگاکانى عێراق کرا و ڕۆژی 21ـی کانوونى دووەم کۆمیسیۆنى باڵاى سەربەخۆى ئەنجامی کۆتایی پەسند کرد، بەپێی ئەنجامی هەڵبژاردن کورد زۆرینەی دەنگەکانی بەدەستهێناوە، بەڵام بەتەنیا ناتوانێت پۆستی پارێزگار لەبەرژەوەندیی خۆی یەکلابکاتەوە. 

 

بۆچی گرنگە: زیاتر لە 6 ساڵە کورد پۆستی پارێزگاری کەرکووکی لەدەستداوە، یەکڕیزیی نێوان لایەنە کوردییەکان یارمەتیدەردەبێت بۆ بەدەستهێنانی ئەو پۆستە. 

 

زانیاریی تایبەت: کاتژمێر 11:00ـی پێشنیوەڕۆی ڕۆژی یەکشەممە 04-02-2024 شاندی پارتی دیموکراتی کوردستان بە سەرۆکایەتیی فازڵ میرانی، بەرپرسی دەستەی کارگێڕیی مەکتەبی سیاسیی پارتی لەگەڵ ئەندامانی مەکتەبی سیاسیی پارتی سەردانی یەکێتیی نیشتمانی کوردستان دەکەن و لە دەباشان لەگەڵ بافڵ تاڵەبانی، سەرۆکی یەکێتیی نیشتمانی کوردستان کۆدەبنەوە. 

 

لێدوانی فەرمی: مستەفا چاوڕەش، ئەندامی پێشووی سەرکردایەتیی یەکێتیی نیشتمانی کوردستان بە ئاڤا نیوزی ڕاگەیاند: "تەوەری سەرەکیی کۆبوونەوەکە پرسی پارێزگاری کەرکووکە، ئومێد دەکەم هەردوولا هەرچی ناکۆکی هەیە بەلاوەی بنێن ڕێکبکەون، چونکە ئێستا عەرەب و تورکمان دژی کورد ڕێککەوتوون".

 

باکگراوند: دوایین کۆبوونەوەی نێوان پارتی دیموکراتی کوردستان و یەکێتیی نیشتمانی کوردستان لە 7ـی تشرینی دووەمی ساڵی ڕابردوو لەسەر ئاستی مەکتەبی سیاسیی لە پیرمام بەڕێوەچوو.