سەرۆکوەزیرانی عێراق و سەرۆکی ئینستیتیوتی مێری ئایندەی شنگال و بارودۆخی ئاوارەکان تاوتوێ دەکەن

ئاڤا نیوز 

 

سەرۆکی ئینستیتیوتی مێری و سەرۆکوەزیرانی عێراق تاوتوێی ئایندەی شنگال و بارودۆخی ئاوارەکان دەکەن و بڕیارە لە ئایندەدا توێژینەوەکانی ئینستیتیوتی مێری لەبارەی شنگال لە ڕاپۆرتێکدا بڵاو بکرێتەوە.

 

وێنە گەورەکە: دلاوەر عەلائەددین، سەرۆکی ئینستیتیوتی مێری لەگەڵ محەممەد شیاع سوودانی، سەرۆکوەزیرانی عێراق کۆبووەوە و تاوتوێی چەند پرسێکیان لەبارەی ئایندەی شنگال وبارودۆخی ئاوارەکانی ئێزدی کرد.

 

لێدوانی فەرمی: د. دلاوەر عەلائەددین، سەرۆکی ئینستیتیوتی ڕۆژھەڵاتی ناوەڕاست بۆ توێژینەوە "مێری" لەبارەی کۆبوونەوەکەی لەگەڵ سوودانی بە ئاڤا نیوزی ڕاگەیاند: ئەو دیمانەیە بەشێکە لە توێژینەوەکانی ئینستیتیوتی مێری لەبارەی شنگال و لە ئایندەدا لە ڕاپۆرتێکدا بڵاوی دەکەینەوە.

 

لەلایەکی دیکەوە: دلاوەر عەلائەدین لە تۆڕی "X" ئەوەشی ڕاگەیاندووە، "سەرەڕای ئاڵۆزییە ئەمنیی و سیاسییەکان، دەکرێت و پێویستە پێشکەوتن لەسەر ئەرزی واقیع بەدەست بهێنرێت لە ئاوەدانکردنەوە و دەستەبەرکردنی خزمەتگوزارییەکان، هاوکات بەشداریپێکردنی سەرجەم شنگالییەکان لە کارە لە پێشینەکان بێت".

 

ئەوەی پێویستە بیزانیت: وەزارەتی کۆچ و کۆچبەرانی عێراق بڕیاری داوە تاکو 30 تەمموزی ئەمساڵ، دەرگای کەمپی ئاوارەکانی عێراق لە هەرێمی کوردستان دابخات، بەڵام ئاوارەکان ناڕازیین و نایانەوێت هەرێمـی کوردستان جێبهێڵن.