چیرۆکی ئەو پێشمەرگەیەی بە دووجار شەهید ناودەبرێت

ئاڤا نیوز

فاخیر ملبرکی، پێشمەرگەیەکی خەڵکی دهۆکە، جارێک بەهۆی تەقینەوەی مین ئەندامێکی جەستەی لەدەست داوە و جاری دووەمیش لە ڕووداوێکی دیکەدا شەهید بوو.

چیرۆکی سەرەکی: د. عەلی تەتەر پارێزگاری دهۆک، لە پۆستێکی فەیسبووکدا چیرۆکی ئەو پێشمەرگەیەی گێڕاوەتەوە کە ڕەتیکردووەتەوە دوای بوون بە خاوەنپێداویستی تایبەتیشی واز لە کاری پێشمەرگایەتی بێنێت و گەڕاوەتەوە سەر کارەکەی تاوەکو شەهید بووە.

چی ڕوویدا: شەهید فاخیر، لە کاتی هەڵگرتنی TNT لە شاری مووسڵ قاچێکی لەدەست دەدات، بەڵام ئامادە نەبووە واز لە کاری پێشمەرگایەتی بێنێت و  ساڵی 2009 دەچێتە لای مەسرور بارزانی کە ئێستا سەرۆکوەزیرانی هەرێمی کوردستانە، داوای لێ دەکات هاوکاری بکات بۆ ئەوەی قاچێکی دەستکرد دروستبکات و  بۆ کارەکەی بگەڕێتەوە.

قووڵتر: لەوکاتەدا مەسرور بارزانی پێی دەڵێت، دەتنێرم بۆ چارەسەر بەڵام ئەوەی لەسەر شانتە کردووتە و ئێستا کاتی ئەوەیە پشوو بدەیت، بەڵام فاخیر ڕەتیکردەوە و گوتی: "هێشتا دەستەکانم کار دەکەن و قاچێکیشم هەیە بۆ ئەوەی بتوانم بەڕێگەدا بڕۆم".

ئەوەی پێویستە بیزانیت: دوای هێرشی داعش ئەو قبووڵی نەکرد دابنیشێت و لە بەرگریکردن دوور بێت، بە یەک قاچ ڕۆڵێکی باڵای هەبوو لە هەڵگرتنەوەی تەقەمەنیدا تاوەکو شەهید بوو.

گۆشەیەکی دیکە: ڕۆژی دووی ئەم مانگە کۆمەڵێک کوڕ و کچی شەهیدان لە زانکۆی ئەمریکی کوردستان – دهۆک کۆتاییان بە خوێندنی خۆیان هێنا، یەکێک لەوانە کوڕی شەهید فاخیر ملبرکی بوو.