هۆشداری لە بەکارهێنانی جۆرێکی دەرمانی ڕۆماتیزم و جومگەکان دەدرێت

ئاڤا نیوز

کوالێتی کۆنتڕۆڵی دەرمان لە هەرێمی کوردستان، هۆشداری لە بەکارهێنانی جۆرێکی دەرمان دەدات کە بەکاردێت بۆ چارەسەرکردنی ئازار، ڕۆماتیزم و هەوکردنی جومگەکان و بە ڕێگەی ئۆنلاین دەفرۆشرێن.

وێنە گەورەکە: کوالێتی کۆنتڕۆڵی دەرمان لەپێناو پاراستنی کوالێتی دەرمان و نەهێشتنی دەرمانی قاچاغ، چەند ساڵێکە لەڕێگەی تیمەکانیان دەرمانخانەکان دەپشكنن و سیستەمی نوێی ستیکەریان بۆ هەموو جۆرێکی دەرمان دیاری کردووە.  

ڕاگەیێنراوی فەرمی: دەزگای کوالێتی کۆنتڕۆڵی جۆری دەرمان لە هەرێمی کوردستان هۆشداری دەدات، هاوڵاتییان بەهیچ جۆرێک ئەو دەرمانانە بەکارنەهێنن کە بە ئۆنڵاین دەفرۆشرێن، لەکاتێکدا ئەم دەرمانانە چوار جۆر دەرمانی دیکەی وەک (دیکلۆفیناک، پیڕۆگزیکام، دێگزامیتازۆن و میزۆکاربامۆڵ)یان تێدایە.

مەترسییە پێشبینی كراوەكان: کوالێتی کۆنتڕۆڵ زانیاری لەبارەی ئەو چوار دەرمانە بەم شێوەیە خستووەتە ڕوو "دیکلۆفیناک و پیڕۆگزیکام؛ دەرمانی دژەهەوکردنی ناستیڕۆیدین، بەکارهێنانیان بەبڕێکی زۆر دەبنەهۆی کونکردنی گەدە و ریخۆڵەکان، بەرزەپەستانی خوێن و ڕوودانی جەڵتە.

زانیاریی زیاتر: دیگزامیتازۆن؛ دەرمانێکی دژەهەوکردنی ستیڕۆیدییە؛ خراپ بەکارهێنانی دەبێتەهۆی نەخۆشیی شەکرە، بەرزەپەستانی خوێن، پووکانەوەی ئێسکەکان و قەڵەوی. میزۆکاربامۆڵ؛ دەرمانێکی خاوکەرەوەی ماسولکەییە، مەترسیی گێژبوون، سڕبوون، نزمەپەستانی خوێن، سستیی چالاکیی فیزیکی و ئەنجامدانی ئەرکەکان دروستدەکات".