بڕیارێکی نوێ بۆ وەرگرتنی گەنمی جووتیاران دەدرێت

ئاڤا نیوز

 

بەڕێوەبەری گشتیی بازرگانی هەرێمی کوردستان ڕایگەیاند، چاوەڕێ دەکەن تاوەکو 700 هەزار تۆن گەنم لەلایەن عێراقەوە وەربگیرێت، دواتر هەر بڕە گەنمێک زیاد بکات ئێمە لە جووتیاران وەریدەگرین.

 

بۆچی گرنگە: چاوەڕان دەکرێت 600 هەزار تۆن گەنم زیاد بکات، حکومەتی هەرێمی کوردستان لە ڕێگەی کۆمپانیاکانی  وەبەرهێنان ئەم بڕە گەنمە لە جووتیاران وەردەگرێت، بەمەش گەنمی جووتیاران بەفیڕۆناچێت.

 
لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤا نیوزی گوت: چاوەڕێ دەکەین 700 هەزار تۆن گەنمەکە وەربگیرێت، هەر بڕە گەنمێک مایەوە، ئەنجوومەنی وەزیران و وەزارەتی کشتوکاڵ و بازرگانی کۆدەبنەوە و ناهێڵین گەنم لە کوردستان بمێنێتەوە و وەریدەگرین، ئەگەر جووتیار بیەوێ  گەنمەکەی ڕادەست بکات.

 

زانیاری بەدەستهاتوو: بەپێی سەرژمێرییەکانی وەزارەتی کشتوکاڵ، ئەمساڵ زیاتر لە دوو ملیۆن و 900 هەزار دۆنم زەوی بە گەنم داچێنراوە، بۆیە چاوەڕوان دەکرێت بەرهەمەکە زیاتر لە ملیۆنێک و 300 هەزار تۆن بێت.