هەڤاڵ ئەبوبەکر: دەسەڵاتی هەڵوەشاندنەوەی پڕۆژەکەی بناری گۆیژەمان نییە

ئاڤا نیوز

پارێزگاری سلێمانی دەڵێت، بابەتی گوێژە ململانێی بازرگان و سیاسییەکانە، "ئێمە دەسەڵاتی هەڵوەشاندنەوەی پڕۆژەکەی بناری گۆیژەمان نییە، بەڵام مەرجمان بۆ جێبەجێکردنی داناوە".

وێنە گەورەکە: پڕۆژەی دروستکردنی یەکەی نیشتەجێبوون لە بناری شاخی گۆیژەی سلێمانی، کاردانەوەی فراوانی لێکەوتووەتەوە و کەمپین بۆ ڕاگرتنی پڕۆژەکە ڕێک خراوە.

لێدوانی فەرمی: هەڤاڵ ئەبوبەکر، پارێزگاری سلێمانی لە کۆنگرەیەکی ڕۆژنامەوانیدا ڕایگەیاند: لەبەرئەوەی لەسەردەمی دەسەڵاتی شارەوانی نوێ ئەو پڕۆژەیە نەدراوەتە ئەو کۆمپانیایە، بۆیە دەسەڵاتی هەڵوەشاندنەوەی پڕۆژەکەمان نییە، بەڵکو مەرجی ژینگەییمان بۆ جێبەجێکردنی داناوە و دەبێت 30%ی زەوییەکە بکرێت بە سەوزایی.

زانیاریی زیاتر: بەپێی یاسا نە دەسەڵاتی تەرخانکردنی زەوی، نە دەسەڵاتی گۆڕینی ڕەگەزی زەوی لای پارێزگار نییە.

ئەوەی پێویستە بیزانیت: بە گوتەی پارێزگاری سلێمانی، پڕۆژەکە لە ساڵی 2010 ئەنجوومەنی شارەوانی پێشوو دەنگی لەسەر داوە و لە ساڵی 2011 دراوەتە ئەو کۆمپانیایە بۆ جێبەجێکردن.