ڕێگەی شێخان - لالش دەکرێتە دووساید

ئاڤا نیوز 

 

لەدوای سەردانەکەی ئەم دواییەی سەرۆکوەزیران بارزانی بۆ پارێزگای دهۆک و لالش، بڕیار دراوە ڕێگەی شێخان - لالش بکرێتە دووساید.

 

بۆچی گرنگە: دووسایدکردنی ڕێگەکە سوودێکی زۆری بۆ سنوورەکە دەبێت، چونکە ڕێگەیەکی گرنگ و گەشتوگوزارییە و قەرەباڵخییەکی زۆری لەسەرە و ڕووداوەکانی هاتووچۆش کەمدەکاتەوە.

 

لێدوانی فەرمی: سەردار شێخ یەحیا، قایمقامی قەزای شێخان بە ئاڤا نیوزی ڕاگەیاند: پێشتر داوایان لە ئەنجوومەنی وەزیران کردبوو، بۆ دووسایدکردنی ڕێگەی شێخان – لالش، سەرۆکوەزیران بارزانی لە چوارچێوەی سەردانەکەیدا بڕیاری لەسەر تەرخانکردنی 18 ملیار و 426 ملیۆن دینار دا بۆ دروستکردنی دووسایدەکە.

 

لەلایەکی دیکەوە: شێخان بەشێکی سەر بە حکومەتی عێراقە، بەڵام قایمقامی قەزایەکە دەڵێت، بەغدا ناوچەکەیانی پشتگوێ خستووە، بەپێچەوانەوە حکومەتی ھەرێمی کوردستانی زۆر پڕۆژەی گرنگ لە شێخان جێبەجێ کردووە.