بەهۆی ڕووداوی ئاگر کەوتنەوە 250 سەر مەڕ سووتان

ئاڤا نیوز

 

بەهۆی کەوتنەوەی ئاگر لە گوندێکی شارەزوور نزیکەی 250 سەر مەڕ سووتان و شوانی مەڕەکان دووچاری هەناسە تەنگی بووە.

 

وێنە گەورەکە: ساڵانە لە وەرزی هاوین ڕووداوەکانی ئاگر کەوتنەوە زیاد دەبن، بەو هۆیەوە هەزاران دۆنم زەوی دەسووتێن و زیانی زۆر دروست دەکەن.

 

لێدوانی فەرمی: ئاوارە حەمە شەریف، بەڕێوەبەری ناحیەی زەڕایەن بە ئاڤا نیوزی ڕاگەیاند، ئاگرەکە کاتژمێر چواری ئێوارەی ئەمڕۆ لە گوندی حاسڵ لە شارەزوور کەوتووەتەوە، بەهۆی هەبوونی بایەکی بەهێز ئاگرەکە لە کۆنترۆڵ دەرچووە، بەو هۆیەوە نزیکەی 250 سەر مەڕ سووتاون. هاوکات شوانەکە بەهۆی دووکەڵەوە دووچاری هەناسە تەنگی بووە.

 

زانیاریی زیاتر: ئەو مەڕانەی سووتاون بەشێکیان حاڵیان خراپە و ڕەنگە بمرن، بەشێکی دیکەیان لیژنەیەکی ڤێرتێرنەری بڕیار لەبارەی چارەنووسیان دەدات، سەردەبڕدرێن یان چارەسەریان پێ دەدرێت.

 

هۆکارە زانراوەکان: بەڕێوەبەری ناحیەی زەڕایەن دەڵێت، دوو هۆکار دیاری کراون، یەکێک ڕەنگە بەهۆی هەورە برووسکە ئاگرەکە کەوتبێتەوە، بەڵام هۆکارێکی دیکە خاوەن مەڕوماڵاتەکان دەیڵێن ئەوەیە، خاوەنی ئەو زەوییانە دوای دروێنە ئەو ئاگرەیان کردووەتەوە بۆ ئەوەی زەوییەکە بیکەنە شوێنی کشتوکاڵی، هەر بۆیە خاوەنی مەڕوماڵاتەکان سکاڵایان لەسەر چەند کەسێک تۆمار کردووە.