هەرێمی کوردستان داوای هاوکاریی نێودەوڵەتی دەکات بۆ ڕووبەڕووبوونەوەی ماددە هۆشبەرەکان

ئاڤا نیوز

 

ڕێكخەری ڕاسپاردە نێودەوڵەتییەكان و بەڕێوەبەری نووسینگەی عێراقی نەتەوەیەكگرتووەكان بۆ كاروباری ماددە هۆشبەرەكان كۆبوونەوە و زێباری دەڵێت، پێویستمان بە هاوكاری نێودەوڵەتییە بۆ ئەو بوارە.

 

وێنە گەورەكە: بەپێی ئەو بەڵگانەی كە لە دەزگا ئەمنییەكانی هەرێمی كوردستانەوە وەرگیراون، ڕێژەی بەكارهێنانی ماددەی هۆشبەر لە هەرێمی كوردستان ڕووی لە زیادبوون كردووە.

 

لێدوانی فەرمی: د. دیندار زێباری، ڕێکخەری ڕاسپاردە نێودەوڵەتییەکان ڕایگەیاند: "ماددە هۆشبەرەکان دیاردەیەکە لە تەشەنەکردن و بەرزبوونەوەدایە، ئێمە لەگەڵ لایەنە نێودەوڵەتی و نێوخۆییەکان سەبارەت بە بەرەنگاربوونەوەی ماددە هۆشبەرەکان لە هەماهەنگیداین،  پێویستمان بە هاوکاری نێودەوڵەتی هەیە لەڕووی لۆجیستی، هونەری و تەکنیکی. 

 

بۆچوونی لایەنی بەرامبەر: عەلی فاروق ئەلبەریر، بەڕێوەبەری نووسینگەی نەتەوە یەکگرتووەکان تایبەت بە ماددەی هۆشبەر و تاوان لە عێراق ستایشی گرنگیدانی حکومەتی هەرێمی کوردستان و هەوڵە بەردەوامەکانی کرد بۆ مامەڵەکردن لەگەڵ مەلەفی ماددەی هۆشبەر و کارتێکەرە عەقڵییەکان.

 

ئەوەی پێویستە بیزانیت: پێنج هەزار و 200 تۆمەتبار لە زیندانەكانی هەرێمی كوردستان دەستگیركراون و لەو ژمارەیەش هەزار و 280 تۆمەتبار سزادراون 80 بەكارهێنەریش گەڕێنراونەتەوە دۆخی ئاسایی خۆیان.