پرۆژەی "تاکسی مەتر" لە هەرێمی کوردستان جێبەجێ دەکرێت

ئاڤا نیوز

 

وەزارەتی گواستنەوە و گەیاندن، لە بەرنامەیدایە پرۆژەی تاکسی مەتر جێبەجێ بکات، پرۆژەکەش بە ئامانجی ڕێکخستنی زیاتری کاری تاکسی و نرخی گواستنەوەیە.

 

بۆچی گرنگە: بە جێبەجێکردنی پرۆژەی "تاکسی مەتر" دادپەروەری لە کرێی گواستنەوە دێنێتەدی و هاونیشتمانیان بەپێی درێژی ڕێگاکە ئەو بڕە پارەیە بە شۆفێری تاکسییەکە دەدەن کە پێوەرەکە دەیخوێنێتەوە، هاوکات کۆتایی بەو مامەڵەیەش دێت کە لەنێوان سەرنشین و شۆفێر لەسەر شەقام دەکرێت.

 

لێدوانی فەرمی: ڕێباز محەمەد خەلیل، بەڕێوەبەری گشتی گواستنەوە لە وەزارەتی گواستنەوە و گەیاندن بە ئاڤا نیوزی ڕاگەیاند: بابەتی تاکسی مەتر لە گفتوگۆدایە و توێژینەوەکانیش لەسەری تەواو کراون، چەند هەنگاوێکی کەم ماوە بۆ ئەوەی لە ماوەیەکی نزیکی داهاتوودا بچێتە بواری جێبەجێکردنەوە".

 

زانیاریی زیاتر: ڕێباز محەمەد، دڵنیایی ئەوە دەداتە شوفێران کە بەهۆی ناجێگری نرخی بەنزین ڕێگە نادەدەن زیانمەند بن و دەڵێت: "هەرێمی کوردستان تاکە وڵات نییە کە کێشەی بەرزی و نزمی نرخی بەنزینی هەبێت، لەگەڵ ئەوەش میکانزمێکی تایبەتمان داناوە بۆ ئەوەی لەگەڵ هەر گۆڕانکارییەک لە بارودۆخی سووتەمەنی نرخەکەی لەگەڵ نرخی ڕۆژ بگونجێنین".

 

شێوازی جێبەجێکردن: لە هەرێمی کوردستان 72 هەزار تاکسی هەن، هاوشێوەی پرۆژەی لەزگە و لۆگۆی تاکسی، شۆفێران پابەند دەکرێن بە بەستنی پێوەری تایبەت، کە کەرتی تایبەت لەوبارەوە هاوکار دەبێت بە شێوەیەک کە بارگانییەکی زۆر لەسەر شۆفێرانی تاکسی دروست نەبێت.