کەسوکاری مامۆستا هێرش عومەر دوای حەوت ساڵ: دەست لە دۆسیەکەمان هەڵناگرین

ئاڤا نیوز

 

نزیکەی حەوت ساڵ بەسەر کوژرانی مامۆستا هێرش عومەر تێپەڕدەبێت، کەسوکارەکەی بەرپرسێکی یەکێتی تۆمەتبار دەکەن و دەڵێن، هەرچەندە سکاڵایان تۆمارکردووە و فەرمانی دەستگیرکردنی بۆ دەرچووە، بەڵام تاوەکو ئێستا دەستگیرنەکراوە.

 

وێنە گەورەکە: هێرش عومەر، مامۆستا و ئه‌ندامی دەستەی مامۆستایانی ناڕازیی کۆیە بوو، ڕۆژی 18-12-2017، لە خۆپێشاندانەکانی شاری کۆیە بریندار دەکرێت و دوای چەند ڕۆژێک لە هەولێر گیان لەدەست دەدات.

 

لێدوانی فەرمی: ئەمڕۆ دووشەممە کەسوکاری مامۆستا هێرش عومەر لە سلێمانی لە کۆنگرەیەکی ڕۆژنامەوانیدا ڕایانگەیاند: لە خۆپێشاندانەکانی 2017ـدا "ژمارەیەک لە مامۆستایان بە فەرمانی بەرپرسی مەڵبەندی کۆیەی یەکێتی تەقەیان لێکرا و بریندارکران، مامۆستا هێرشیش لەنێویاندابوو و شەهید کرا".

 

زانیاریی زیاتر: بەپێی قسەی کەسوکاری مامۆستاکە هەر ئەوکات سکاڵایان تۆمارکردووە و فەرمانی دەستگیرکردن بۆ بەرپرسەکەی یەکێتی دەرچووە، بەڵام تاوەکو ئێستا "تاوانبار یەک خولەکیش دەستگیر نەکراوە و دادوەر بە نایاسایی فەرمانی ئازادکردنی بۆ دەرکردووە".

 

قووڵتر: کەسوکارەکەی ئاماژە بەوەش دەکەن چەندین بەڵگەیان داوەتە دادگە کە ئەو بەرپرسە "تاوانباری سەرەکیی دۆسیەکەیە"، تاوەکو مافی خۆیشیان وەنەگرن دەست لەو دۆسیەیە هەڵناگرن.