پرۆسەی وەرگرتنی گەنم و دابەشکردنی پارەی جووتیاران بەردەوامە

ئاڤا نیوز 

 

پڕۆسەی وەرگرتنی گەنم لە سایلۆکانی هەرێمی کوردستان بەردەوامە و جووتیاران لەگەڵ ڕادەستکردنی گەنمەکەیان پارەش وەردەگرن.

 

وێنە گەورەکە: ڕۆژی 06-06-2024 دەرگای 10 سایلۆ و چەند بنکەیەک بۆ وەرگرتنی گەنم لە شارەکانی هەرێمی کوردستان کرانەوە، بەپێی ڕێککەوتنی نێوان هەولێر و بەغدا، ئەمساڵ 700 هەزار تۆن گەنم لە جووتیاران وەردەگیرێت، بۆ هەر تۆنێک بڕی 850 هەزار دینار بە جووتیاران دەدرێت.

 

لێدوانی فەرمی: نازم محەممەد، بەڕێوەبەری سایلۆکانی پارێزگای دهۆک بە ئاڤا نیوزی ڕاگەیاند، تاوەکو ئێستا سێ ملیار دینار وەک شایستەی جووتیارانی دهۆک، یەک ملیار و 500 ملیۆن دینار بۆ هەولێر و یەک ملیار و 500 ملیۆن دینار بۆ سلێمانی هاتووە، کە کۆی گشتی دەکاتە شەش ملیار دینار.

 

ئەوەی پێویستە بیزانیت: عێراق کۆمەڵێک مەرجی قورسی داناوە بۆ پەسەندکردنی گەنمی جووتیاران و وەرگرتنیان لە سایلۆکان، ئەمەش هۆکارێکە بۆ ڕەتکردنەوەی بەشێکی زۆر.

 

ژمارەکان وا دەڵێن: ئەو بڕە گەنمەی دیاری کراوە بۆ وەرگرتن کە 700 هەزار تۆنە، دەبێت حکومەتی عێراق بڕی 595 ملیار دینار بۆ جووتیارانی هەرێمی کوردستان بنێرێت.